Մալաթիա-Սեբաստիա վարչական շրջանի ընդհանուր իրավասության դատարանում Արտակ Զախարյանի նախագահությամբ ավարտվել է Յիլմազ Զեքի Տաշի գործի դատավարությունը:
26-ամյա Յիլմազը Թուրքիայի քաղաքացի է, Ստամբուլի Շիշլի թաղամասի բնակիչ, իր խոսքերով՝ 5-ամյա կրթություն է ստացել:
Ըստ դատական ակտի՝ 2013 թվականի սեպտեմբերի 30-ին «Ստամբուլ-Երևան» չվերթով այս ստամբուլցին Թուրքիայից Հայաստան է ժամանել՝ ներքնազգեստի՝ վարտիքի հատուկ գրպանիկ-թաքստոցում մաքսային հսկողությունից թաքցնելով ու Հայաստան ներկրելով 585 հարգի ոսկե շղթաներ՝ 1229, 588 գրամ ընդհանուր քաշով և 18 միլիոն 930 հազար դրամ ընդհանուր արժողությամբ:
Շղթաները նույն օրը «Զվարթնոց» օդանավակայանի բեռնահամալիրում ԱԱԾ աշխատակիցների կողմից կատարված կրկնակի զննությամբ հայտնաբերվել են Յիլմազի վարտիքի գրպանիկում:
Յիլմազ Տաշն իրեն լիովին մեղավոր է ճանաչել, նրա գործը քննվել է արագացված կարգով:
Դատարանը թուրք ամբաստանյալին մեղավոր է ճանաչել մաքսանենգության համար՝ ՀՀ քրեական օրենսգրքի 215 հոդվածի 1-ին մասով, և դատապարտել է 1 տարի 6 ամիս ազատազրկման:
Պատժի սկիզբը՝ 2013 թվականի սեպտեմբերի 30-ից:
Յիլմազ Տաշի մոտից առգրավված 18 միլիոն 930 հազար դրամ արժողության ոսկե շղթաները՝ մաքսանենգության առարկաները, բռնագրավվել են հօգուտ Հայաստանի Հանրապետության:
Ստամբուլի Շիշլի թաղամասի բնակիչը «Երևան-Կենտրոն» ՔԿՀ-ի կալանավոր է դարձել: