Չինաստանի հարավային Հուանդուն նահանգում բացվել է աշխարհում առաջին 5G հինգերորդ սերնդի կապի ցանցերով հագեցած Նանշա կամուրջը, ապրիլի 3-ին հաղորդում է Xinhua լրատվական գործակալությունը:
Չինաստանի Պետական խորհրդի կազմում գործող Չինաստանի ակտիվների վերահսկման և կառավարման պետական հանձնաժողովը հաղորդել է, որ Հուանդուն – Հոնկոնգ – Մակաո 12.89 կմ երկարությամբ կամուրջը, լինելով «Մեծ ծովածոցի» տարածաշրջանի կարևոր տրանսպորտային նախագիծը, չորրորդ և հինգերորդ սերնդի հաղորդակցության ցանցերի հասանելիություն է ապահովում:
Ցանցին հարթ հասանելիության ապահովման համար բազային հաղորդակցման կայանները տեղադրվել են լույսերի սյուների և աշտարակների վրա՝ նորարարական տեխնիկայի կիրառմամբ: 40,5 մետր լայնությամբ Նանշա կամուրջը աշխարհում պողպատե կառուցվածքով ամենալայն կամուրջն է:
Կամուրջն իրար է կապում «Մեծ ծովածոցի» երկու հիմնական քաղաքները՝ Գուանչժոուն և Դունգուանը: Այն նախատեսված է մինչև 100 կմ/ժ արագությամբ ավտոմեքենաների համար և դրա հիմնական նպատակը երկու քաղաքների միջև տեղափոխման ժամանակի կրճատումն է և խցանումների կրճատումը: