Ուկրաինայի նախագահի թեկնածու, շոումեն Վլադիմիր Զելենսկին Վրաստանի նախկին նախագահ Միխայիլ Սահակաշվիլիին լուրջ դիվանագետ է անվանել և նշել, որ նրա օգնությունը պետք կլինի բոլորին:
2019-ի մարտին Սահակաշվիլին հայտարարել էր, որ մտադիր է ապրիլի 1-ին Ուկրաինա ժամանել, քանի որ համոզված է, որ Պորոշենկոն նախագահական ընտրությունների երկրորդ փուլ չի անցնի, և այդ իսկ պատճառով ոչ ոք չի խանգարի իրեն երկիր մուտք գործել: Նա նաև հեռախոսով ցուցադրել է տոմսը:
«Թող գա, ես կարծում եմ, որ Միխայիլ Սահակաշվիլին այժմ մեծ դերակատարում ունի Եվրոպայում Ուկրաինայի ժողովրդավարության պօաշտպանության գործում և դա ցույց է տալիս իր գործողություններով: Նա լուրջ դիվանագետ է և լուրջ խորհրդատու բոլորի համար, բոլոր թեկնածուների համար, որոնք այսօր քաղաքականության մեջ են… Ես կարծում եմ, որ Սահակաշվիլիի նման մարդու օգնությունը պետք կգա բոլորին»,- հայտարարել է նա, պատասխանելով վրացական առաջին ալիքի լրագրողի հարցին:
Կիրակի օրը Ուկրաինայում կայանալիք նախագահական ընտրություններում պայքարում է 39 թեկնածու, ինչը ռեկորդային է: Նախագահական մրցավազքում առաջատարը շոումեն Վլադիմիր Զելենսկին է, որին պատրաստ է աջակցել ընտրողների՝ 30%-ը: Պետության ներկայիս ղեկավար Պետրո Պորոշենկոյին պատրաստ է ձայն տալ քաղաքացիների մոտ 17%-ը, իսկ «Բատկիվշչինա» կուսակցության առաջնորդ Յուլիա Տիմոշենկոյին՝ 12.5%-ը: