Սերժ Սարգսյանը երկու ամիս ժամկետ էր սահմանել գյուղի վիճակը բարելավելու համար: Այսօր զրուցեցինք Արագածոտնի մարզի Ոսկեվազի գյուղապետ Հայկ Հովհաննիսյանի հետ՝ պարզելու համար, թե այս ընթացքում ինչ դրական տեղաշարժ է արձանագրվել գյուղում: Հատկապես, որ կարկտահարությունից ամենաշատը տուժած գյուղերից մեկը Ոսկեվազն է:
Նա մեզ հետ զրույցում նշեց, որ կարկտահարությունից հետո որպես աջակցություն 10 տոննա սոյլարկա են ստացել, որը բաժանվել է 500 ընտանիքների միջև, որովհետև գյուղի մի մասն էր կարկտահարությունից տուժել:
Մեր այն հարցին, թե վնասի քանի՞ տոկոսն է փոխհատուցվում այդ օգնությամբ՝ պատասխանեց. «Բնականաբար չի կոմպենսացնում, բայց այս 10 տարիների ընթացքում դա առաջին մոտեցումն էր, և հուսով եմ, որ պետական այլ աջակցություն էլ կստանանք: Խնդիրը կայանում է նրանում, որ բնական աղետից հետո գյուղում բերք չի մնացել: Գյուղացուն պետք է ճիշտ հասկանալ, ժողովուրդը այն աստիճան տուժած է, որ ինչքան էլ փոխհատուցում տան, գյուղի հոգսերի 10 տոկոսն էլ չի կոմպեսացվի:
Իսկ, եթե գյուղի բնակչին լսելով լիներ, ապա գյուղացին կառաջարկի ձրի ջուր, վառելիք, թունաքիմիկատ, տեխնիկա, հարկերը զիջվի: Բայց, եթե գյուղի հողի հարկը չի վճարվում, պետության կողմից դոտացիա չտրվի, ես ինչպես եմ մանկապարտեզ, դպրոց պահելու: Մեր բյուջեի հիմնական մասը հողից է ստացվում:
Ամեն դեպքում գյուղացիները շարունակում են տանջվել, աշխատել, ապրել: Լավ թե վատ, դա արդեն հարցի մյուս կողմն է»: