«Թավշյա հեղափոխությունը հաջողության հասավ քաղաքացիականությունը կարևորելու միջոցով, երբ մարդկանց մեջ առաջին պլան մղեց իր ձայնի, իր խոսքի, պրոցեսներին իր մասնակցության կարևորությունը»,- «Առաջին լրատվական»-ի հետ զրույցում ասաց մշակութային մարդաբան Աղասի Թադևոսյանը և հավելեց, որ եթե այս արժեքները լինեին մինչ հեղափոխությունը, ապա հեղափոխություն տեղի չէր էլ ունենա:
Նրա խոսքով՝ մի քիչ չափազանցված կլինի ակնկալել, որ հասարակությունը միանգամից պետք է փոխվեր. «Մարդկանց համար սովորություն էր դարձել, որ իրենք պետք է նպաստեն իշխանության փոփոխությանը, իսկ դրանից հետո ամեն ինչ պետք է իշխանությունն ինքն աներ: Այս հեղափոխությունը նրանով էր տարբերվում, որ ի սկզբանե մարդուն առաջարկում էր անել իր քայլը: Ենթադրվում է, որ այդ մտածողությունը պետք է լինի շարունակական, այլ ոչ թե մեկ քայլ արեցիր՝ իշխանություն փոխեցիր, ու հետո պետք է գնաս նստես տանը»:
Մեր զրուցակիցը նշեց, որ իր հետազոտության արդյունքում այն եզրակացության է հանգել, որ երիտասարդության շրջանում բավական ազդեցիկ են քրեական ծագում ունեցող նորմերը, որոնք նպաստում են երիտասարդության մեջ դեստրուկտիվ վարքագծի խրախուսմանը՝ ի հակակշիռ կոնստրուկտիվ, ստեղծարար ստեղծագործականի. «Այդ պրոբլեմը մենք իրոք ունենք, և կարիք չկա շահարկելու Փաշինյանի հայտարարությունը՝ թքող և պպզող երիտասարդների վերաբերյալ»:
Իսկ թե որտեղից է պետք սկսել, մարդաբանը կարծում է, որ արմատական փոփոխոթյունները պետք է ակնկալել հենց կրթական համակարգում՝ նախադպրոցականից սկսած, վերջացրած հանրակրթականով ու բուհականով. «Մենք այսօր կարիք ունենք կրթական համակարգի լուրջ համակարգային ախտորոշման՝ նաև արժեքային տեսանկյունից»:
Հարցազրույցն ամբողջությամբ՝ տեսանյութում:
