Անքնությունը քնի ծանր խանգարում է, բայց 54-ամյա Նիլ Էպշտեյնը պատրաստ է շոնրհակալություն հայտնել ճակատագրին, որ գիշերները չի քնում։ Ինչպես տեղեկացնում է The Daily Mail-ը, շնորհիվ անքուն գիշերների տղամարդն իր մեջ թաքնված տաղանդներ է հայտնաբերել և անգամ սկսել է բանաստեղծություններ գրել։
Քնի հետ կապված խնդիրները Նիլի մոտ առաջ են եկել դեռ մանուկ տարիքից։ Հավանաբար, օրգանիզմն այնքան էր սովորել քնի պակասին, որ երբեմն Նիլին բավական էր 20 րոպե ննջել, որպեսզի վերականգներ ուժերը։ Տղամարդը հաշվարկել էր. ամեն 10 տարին մեկ անքնությունն իրեն «նվիրում» է երկու տարվան հավասար հավելյալ ժամանակ։ Մինչ ողջ աշխարհը քնած է, Նիլը փորձում է գիշերվա ժամերն օգտագործել շահավետ։ Նա սովորել է դաշնամուր նվագել, ֆրանսերեն, և չի պատրաստվում սահմանափակվել ձեռք բերածով։
Նիլի՝ անքնությունից ազատվելու փորձերը հաջողությամբ չեն պսակվել։ Տղամարդը փորձել է ամեն ինչ՝ սկսած քնաբերներից մինչև ասեղնաբուժությունը, բայց միայն հազվադեպ գիշերներին է նրան հաջողվում քնել 20 րոպեից ավելի։ «Միջինը ես քնում եմ շաբաթը 10 ժամ»,- ասել է նա։
Երիտասարդ տարիքում դա առավելություն էր, չէ՞ որ Նիլը կարող էր ամբողջ գիշերն անցկացնել երեկույթներում և չհոգնել։
Ավագ տարիքում օրգանիզմի զարմանալի հատկությունը օգտակար եղավ երկարատև երթուղիների վարորդ աշխատելիս։ Բացի այդ, նա գիշերները հանգիստ խնամել է իր չորս երեխաներին, որպեսզի կինը կարողանա քունն առնել։
«Ես լավ եմ դիմանում քնի պակասին, դա իմ կյանքն է»,- նշում է Նիլը։
