Սփյուռքի գործերի հանձնակատարի ինստիտուտով մենք փորձում ենք բարձրացնել մեր կապերը Սփյուռքի հետ։ Այս մասին «Առաջին լրատվական»-ի հետ զրույցում նշեց Սփյուռքի փոխնախարար Բաբկեն Տեր-Գրիգորյանը։
«Մենք պարբերաբար աշխատում ենք մեր տարբեր համայնքների ներկայացուցիչների հետ։ Անձամբ ես շաբաթը գոնե մի քանի անգամ սփյուռքյան մամուլի ասուլիսներ եմ կազմակերպում և երբ ճիշտ մեկնաբանությունը ներկայացվում է իրենց, նրանք ոչ թե մտահոգություն են հայտնում, այլ ավելի ոգևորվում են, որովհետև իրենք էլ են հասկանում, որ անցյալում Սփյուռքի նախարարությունը չի աշխատել այնքան արդյունավետ, որքան իրենք կցանկանային։ Այս նոր ձևաչափով մենք հաշվի ենք առնում այն բոլոր թերությունները, որ եղել են Սփյուռքի նախարարությունում և նոր լուծում ենք տվել»,-ասաց նա։
Բաբկեն Տեր-Գրիգորյանի խոսքով, իրենք ասում են, որ չի լինելու մեկ Սփյուռքի նախարարություն, բայց լինելու են 12 նախարարություններ, որոնք զբաղվելու են Սփյուռքի հարցերով իրենց մասին, իսկ հանձնակատարի գրասենյակը լինելու է այդ բոլոր գերատեսչություններին համակարգող մարմինը։
