«Մենք դեմ ենք մետրոյի թանկացմանը» նախաձեռնող խումբը ձևավորվել և իր գործունեությունն իրականացնում է Facebook սոցիալական ցանցում: Այսօր նախաձեռնող խմբի անդամներ Արման Գևորգյանը, Էդգար Մուրադյանը, Իրինա Դավթյանն ու Սպառողների ասոցիացիա ՀԿ նախագահ Արմեն Պողոսյանը ներկայացրին իրենց դժգոհությունները մետրոպոլիտենին սակագնի թանկացման վերաբերյալ և ներկայացրին այն քայլերը, որոնք մինչ այս արել են:
Արման Գևորգյանը նշեց, որ ֆեյսբուքյան իրենց էջում արդեն բավականին մեծ թվով մարդիկ քննարկումներ են կազմակերպում և արտահայտում իրենց դժգոհություններն ու առաջարկները: Նա նաև տեղեկացրեց, որ հունիսի 29-ին նամակ են հղել ՀՀ նախագահին, վարչապետին և քաղաքապետին այս խնդրի հետ կապված:
Էդգար Մուրադյանն էլ արձագանքեց, որ քաղաքապետին ուղղված նամակը տեղադրվել է նաև վերջինիս ֆեյսբուքյան էջում՝ ակնկալիքով, որ նա ավելի շուտ կարձագանքի իրենց նամակին:
Նախաձեռնող խմբի անդամ, տնտեսագետ Իրինա Դավթյանն էլ նշեց, որ իրենք ցանկանում են հանրային քննարկում կազմակերպել և այդ ժամանակ հասնել ճիշտ ու բոլորի կողմից ընդունելի որոշման: Նրա խոսքերով, թանկացման կարիք ամենևին էլ չկար և պատճառներն էլ հիմնավորված չեն, քանզի մետրոպոլիտենը մոտ 1 մլրդ դրամի չափով տարեկան սուբսիդիա է ստանում պետբյուջեից, օրական մետրոյից օգտվում է 50 հազար քաղաքացի, ինչի արդյունքում տարեկան ժետոնների վաճառքից ձևավորվում է 730 մլն դրամ, ինչպես նաև վարձակալության ու բավականին շատ գովազդային վահանակների շնորհիվ մետրոն հավելյալ եկամուտներ է ստանում: Իրինա Դավթյանը նկատեց, որ այս ամենից ելնելով հստակ է, որ մետրոպոլիտենը միլիարդավոր եկամուտներ է ստանում, և իրենք պահանջում են այդ բոլոր եկամուտների ու ծախսերի փաստաթղթերը հրապարակել հանրության համար, հակառակ դեպքում, ըստ Դավթյանի, մոնոպոլիայի ստեղծման տպավորություն է առաջանում:
