Թուրքիայի ԱԳՆ պաշտոնական ներկայացուցիչ Համի Աքսոյը հայտարարել է, որ Չեխիայի նախագահ Միլոշ Զեմանի խոսքերը, ով Թուրքիային անվանել էր «ԴԱԻՇ-ի փաստացի ներկայացուցիչ», զրպարտություն են և չեն համապատասխանում Անկարայի և Պրահայի բարեկամական հարաբերություններին։ Այդ մասին տեղեկացնում է TASS-ը։
«Մենք չենք ընդունում և վճռականորեն քննադատում ենք Չեխիայի նախագահ Միլոշ Զեմանի կեղծ և զրպարտող հայտարարությունները, որոնք ուղղված են մեր պետությանն ու մեր նախագահին։ Ակնհայտ է, որ այդ զրպարտությունը չի համապատասխանում Չեխիայի հետ մեր բարեկամական և դաշնակցային հարաբերություններին»,- ասվում է հայտարարության մեջ։
Ավելի վաղ՝ մարտի 19-ին Զեմանը հայտարարել էր, որ Թուրքիան որպես միջնորդ հանդես է եկել ԴԱԻՇ-ին զինելու գործում, երբ բռնագրավել է Սիրիայի և Իրաքի զգալի մասը։
