Կառավարության կառուցվածքային փոփոխության արդյունքում մենք չունենք Մշակույթի նախարար, ունենք մշակույթի նախարարի պարտականություններ կատարող փոխնախարար, որը, ըստ օրենքի, ունի բոլոր այն գործառույթները, որոնք վերապահված են նախարարին, այդ թվում նաև որոշումներ կայացնելու իրավունքը:
ՊՈԱԿ-ների լուծարման և միավորման չարչրկված թեմայից և մշակույթի նախարարի պաշտոնակատարի ասուլիսից հետո պարզ դարձավ, որ դա եղել է ոչ թե անձնական նախաձեռնություն, այլ կառավարության հանձնարարական: Հասարակությանը և հատկապես մշակութային հանրությանը հետաքրքրում է, թե ով է եղել այդ հանձնարարականի հետևում և ինչ սկզբունքների վրա է հիմնված եղել այն:
«Առաջին լրատվական»- ի հետ զրույցում Մշակույթի նախարարի պաշտոնակատար Նազենի Ղարիբյանը նշեց, որ այդ նույն բովանդակությամբ հանձնարարականներ ստացել են բոլոր նախարարությունները. «Այդ հանձնարարականների հիմքում ընկած է օպտիմալացման և արդյունավետության բարձրացման հրամայականը: Մեզ հանձնարարված էր կատարել վերլուծություն, դրա արդյունքում առաջարկություններ անել, թե ինչպես ենք տեսնում ՊՈԱԿ-ների գործունեության արդյունավետության բարձրացման ձևերը, մեխանիզմները: Հանձնարարականում չկար ցուցում, որ պետք է առաջնորդվել կրճատման տրամաբանությամբ, նպատակը գործունեության արդյունավետության բարձրացումն է: Մենք արել ենք մեր աշխատանքը, ինչպես կարողացել ենք:
Ասելով սևագիր փաստաթուղթ՝ ես նկատի ունեմ, որ դա վերլուծության առաջին փաթեթն էր, նախարարությունը երբևէ նման հանձնարարություն չէր ստացել և նման աշխատանք չէր իրականացրել: Դա որոշման նախագիծ չէ… Չեմ կարող ենթադրել, թե այդ սևագիր տեղեկանքի մասին արտահոսքն ում կողմից է եղել»:
Ն. Ղարիբյանի խոսքով՝ ՊՈԱԿ-ների վերակազմակերպումն անխուսափելի է:
Մանրամասն՝ տեսանյութում:
