Լևոն Տեր Պետրոսյանը վերջին հանրահավաքի ժամանակ մասնավորապես առանձնացրեց երկու կետ՝ Մարտի 1-ի դեպքերի բացահայտում և արտահերթ ընտրությունների անցկացում: Իսկ վերջնաժամկետ նշանակեց սեպտեմբերը:
ԱԺ ՀՀԿ-ական պատգամավոր, ԱԺ մարդու իրավունքների մշտական հանձնաժողովի փոխնախագահ Ռաֆիկ Պետրոսյանի հետ խոսեցինք Մարտի 1-ի բացահայտման հնարավորությունների մասին:
Նրա խոսքերով, մինչև սեպտեմբեր հնարավոր է ինչ-որ էպիզոդներ բացահայտվեն Մարտի 1-ի գործից, բայց ամբողջությամբ՝ ոչ: «Էս արդեն քանի տարի եղավ քննում-քննում են, քննչական գործողություններ են կատարում, բայց չի բացահայտվում: Իսկ դա գալիս է այն դժվարությունից, որ մասայական անկարգության ժամանակ չի երևում, թե ով ինչով է զբաղվում»,- նշեց Ռաֆիկ Պետրոսյանը:
Ինչ վերաբերում է հրաման տվողին, ապա ոչ ոք նման գործողությունների հրաման չի տվել: Հրաման երևի տվել են կանխել նման գործողությունները, հակապետական ելույթները, զենքի գործադրումը, բայց բռնություն կիրառելու հրաման չկա»,- նշեց Ռաֆիկ Պետրոսյանը:
Մեր այն հարցին, թե որքա՞ն ժամանակ է պետք, որ Մարտի 1-ի գործով ռեալ բացահայտումներ տեղի ունենան՝ պատասխանեց. «Եթե քննչականը ինտենսիվ տեմպով աշխատի, քննչական հատուկ ծառայությունը, փորձաքննությունները ներառյալ 1 տարի մոտավորապես կպահանջվի գործն ամբողջությամբ բացահայտելու համար»: