Մարոկկոյի բնակիչներն այսօր կողմ են քվեարկել օրեր առաջ այդ երկրի միապետ Մուհամադ 6-րդի կողմից առաջարկված սահմանադրության նոր տարբերակին, որը դրվել էր հանրաքվեի: Այս քայլով միապետը փորձել է մեղմել փողոցային բողոքի ակցիաները, որոնք պարբերաբար բռնկվում են Թունիսում և Եգիպտոսում տեղի ունեցած հեղափոխություններից հետո:
Սահմանադրության մեջ առաջարկված փոփոխություններով ավելացվում են գործադիր մարմնի իրավասությունները, սակայն թագավորը շարունակում է մնալ բանակի, կրոնական և դատական համակարգերի ղեկավար, ինչպես նաև նրան իրավունք է վերապահված ցրելու խորհրդարանը, չնայած դրա ընթացակարգը բավականին դժվարացվել է:
Ընդդիմությունը, սակայն, շարունակում է պնդել, որ այս փոփոխությունները բավարար չեն անհրաժեշտ բարեփոխումներն իրականացնելու համար՝ պահանջելով երկիրը դարձնել սահմանադրական միապետություն, երբ թագավորի գործողությունները կգտնվեն օրենսդիր մարմնի վերահսկողության ներքո: