Արձագանքելով Լևոն Տեր-Պետրոսյանի երեկվա ելույթին՝ այսօր ՀՀԿ խմբակցության քարտուղար ԱԺ պատգամավոր Էդուարդ Շարմազանովը մեզ հետ զրույցում նշեց, թե չի կարծում, որ ժամկետներ նշելը ժողովրդավարական մեթոդ է և ճանապարհ է երկխոսության:
«Իշխանությունը, նախագահի գլխավորությամբ, տվել է երկխոսության լայն հնարավորություն: Իսկ ինչ վերաբերում է արտահերթ նախագահական ընտրություններին՝ նախագահը Ստրասբուրգում հստակ պատասխանել է, որ թե՛ խորհրդարանական, թե՛ նախագահական ընտրությունների հարցը օրակարգում չէ, և ոչ էլ դրա նախադրյալները կան: Ավելին՝ այս պահին ավելացնելու ոչինչ չկա այդ առումով»,- նշեց Էդուարդ Շարմազանովը:
Նա միևնույն ժամանակ կարծում է, որ թե՛ իշխանությունը, թե՛ արտախորհրդարանական ընդդիմությունը ցանկանում են քաղաքական միջոցառումները իրականացնել երկխոսության ճանապարհով: «Հակառակ դեպքում, ցանկացած այլ միջոցառում, ոչ կառուցողական քայլ օգուտ չի բերում որևէ մեկին, այդ թվում՝ հասարակությանը: Իշխանությունը այս առումով իր լրջախոհությունը ցույց է տվել: Հիմա ՀԱԿ-ը պետք է որոշի՝ կառուցողական քայլերո՞վ առաջ ընթանալ, թե՞ գնալ հին ճանապարհով»,- առաջարկեց Էդուարդ Շարմազանովը:
Ինչ վերբերում է սեպտեմբերյան սրացումներին՝ նա նշեց, որ դրանք հարաբերական երևույթներ են, քանի որ նախընտրական ժամանակաշրջան ենք թևակոխում, հետևաբար, ոչ միայն ՀԱԿ-ի և ՀՀԿ-ի, այլ նաև մյուս ուժերի միջև սրացումներ կնկատվեն:
«Այս առումով սպասելի են ամբոխահաճո արտահայտությունները: Դա բնական երևույթ է բոլոր, այդ թվում՝ ժողովրդավարական երկրներում: Այդ երկրների շարքում Հայաստանը ևս բացառություն չէ: Սակայն այդ ամենը պետք է լինի օրենսդրության սահմաններում: Խոսքս թե՛ իշխանության, թե՛ ընդդիմության մասին է»,- եզրափակեց Էդուարդ Շարմազանովը: