«Ես համաձայն չեմ, որ Ազգային ճակատը պետք է լինի զուտ քաղաքական միավորում, դա պետք է լինի միաձուլում բոլոր ուժերի, որովհետև եթե ազգային ճակատը միայն կուսակցական լինի, ապա ինքնին ազգային ճակատ չի լինի, դա կլինի կուսակցական ճակատ»,- այսօր լրագրողների հետ հանդիպման ժամանակ, բնութագրելով իր ստեղծած Ազգային ճակատը, ասաց Ժողովրդական կուսակցության առաջնորդ Տիգրան Կարապետյանը:
Նրա խոսքերով, հասարակության լայն շերտերը պետք է մասնակցեն ազգային ճակատի գործունեությանը: Կարապետյանը նկատեց, որ իրենք իրենց առջև չեն դնում ձևաչափ միավորելու քաղաքական կուսակցություններին:
Կարապետյանն ընդգծեց, որ իրենք նպատակ չեն դնում միավորվելու որևէ քաղաքական ուժի հետ. «Մենք բաց դռներ ենք անցկացնում, ով ցանկանում է՝ մենք բաց ենք յուրաքանչյուրի համար, եթե ազնիվ մղումներ ունի և նպատակներ»:
Այդուամենայնիվ, ըստ ԺԿ առաջնորդի, շատ լավ և տեղին կլիներ, որ իշխանությունից և ՀԱԿ-ից դուրս ուժերը կարողանան ընդհանուր եզրեր գտնել:
Հարցին, թե ո՞րն է լինելու Ազգային ճակատի պահանջը և նպատակը, Տիգրան Կարապետյանը պատասխանեց. «Իշխանափոխություն»:
Իսկ թե երբ են իրականացնելու այդ իշխանափոխությունը՝ Կարապետյանը նշեց. «Մենք հո ՀԱԿ-ը չենք, որ ասենք՝ ժողովուրդ, համբերեք, քիչ մնաց, 30 օրից, 20 օրից: Մենք համարում ենք, որ դա կախված է ժողովրդից»: