«ԱրմենՏել» ընկերության (ապրանքանիշը՝ Beeline) Hi-Line ծառայությանը միացել է 100,000-րդ բաժանորդը: Դա 23-ամյա ուսանողուհի, Հրազդան քաղաքի բնակիչ Անի Ավեստիսյանն է, ով այսուհետ կօգտվի Hi-Line «Մեգա 512» սակագնային փաթեթից:
«Սա շատ արժեքավոր իրադարձություն է Հայաստանում ինտերնետ կապի զարգացման տեսանկյունից»,- ասաց «ԱրմենՏել» ընկերության գլխավոր տնօրեն Իգոր Կլիմկոն՝ շնորհավորելով «հոբելյանական» բաժանորդին:
«Մեր ծառայությունը հատուկ ներկայացման կարիք չունի, քանի որ այն իրոք մեծ ժողովրդականություն է վայելում: Հայաստանի ինտերնետ ծառայությունների ոլորտում Hi-Line ապրանքանիշն ամենաճանաչվածն է, որը ոչ միայն գրավեց շուկան այլ նաև մեր հաճախորդների սրտերը: Մեր աշխատակիցների ջանքերի և բազմամիլիոնանոց ներդրումների շնորհիվ մենք հասանք այդ արդյունքին: Մենք աճում էինք հաճախորդների հետ միասին. ավելացնում էինք արտաքին կապուղիները, զարգացնում ենթակառուցվածքները երկրի ներսում, առաջարկում սպասարկման նորագույն հնարավորություններ, ներգրավում լավագույն մասնագետներին և սովորում կառավարման նոր մեթոդներ: Այժմ մենք տեսնում ենք երջանիկ 100,000-րդ բաժանորդին և մենք երջանիկ ենք Անիի հետ»,- հավելեց Իգոր Կլիմկոն:
Անի Ավետիսյանը «ԱրմենՏել» և Hewlett Packard ընկերություններից նվեր ստացավ Hi-Line ծառայությունից 1 տարի անվճար օգտվելու բաժանորդագրություն և HP Mini նեթբուք:
Նա լրագրողներին ասաց, թե սկզբում չի հավատացել, ապա «շատ-շատ» ուրախացել է:
«ԱրմենՏել» ՓԲԸ-ն մատուցվում է Hi-Line ծառայություն 2007 թվականից: Այն հիմնված է ADSL (Asymmetric Digital Subscriber Line – ասիմետրիկ թվային բաժանորդային գիծ) տեխնոլոգիայի վրա, որը թույլ է տալիս ապահովել արագ ինտերնետ-մուտք սովորական հեռախոսագծով` թողնելով այն ազատ հեռախոսազանգերի համար: Ներկայում Hi-Line ծառայությունը հասանելի է Հայաստանի շուրջ հիսուն բնակավայրում: