«Այսօր սահմանադրական փոփոխությունների վերաբերյալ օրակարգի առաջ քաշումը և դրա շուրջ բանավեճի ծավալումը առաջնահերթությունների մեջ չեն մտնում՝ ո՛չ գործող քաղաքական իշխանությունների, ոչ էլ հասարակության: Մեր հանրությունն այսօր բոլորովին այլ տրամադրվածություն ունի և ակնկալում է, որ իր կողմից վստահության մանդատ ստացած իշխանությունը 1-2 տարում կարդարացնի իրեն տրված մանդատը և կիրականացնի այնպիսի ռեֆորմներ, որոնք կբխեն հասարակության պահանջմունքներից»,- «Առաջին լրատվական»-ի հետ զրույցում ասաց փաստաբան Նորայր Նորիկյանը:
Մեր զրուցակիցը նկատեց, որ ինքն առանձնապես ոգևորված չի եղել Սահմանադրության վերջին փոփոխությամբ, որովհետև կարծում էր, որ կիսանախագահականից խորհրդարանական կառավարման համակարգին անցնելու փոփոխությունը միտված էր Սերժ Սարգսյանի իշխանության հավերժացման գործընթացին. «Բայց հիմա մենք ապրում ենք իսկապես լեգիտիմ ընտրված իշխանության պայմաններում, և ուղղակի հանրությունն ունի ողջամիտ և լեգիտիմ ակնկալիք, որ հասարակության վստահության քվեն ստացած այս իշխանությունը կիրականացնի այն քայլերը, որոնք հիմք կդառնան իր կյանքի բարելավման: Հիմա խորհրդարանակա՞ն կառավարման համակարգի պայմաններում կիրականանա դա, թե՞ կիսանախագահական՝ դա արդեն երկրորդական հարց է, ճաշակի խնդիր է»:
Այնուամենայնիվ, Նորայր Նորիկյանը վաղաժամ է համարում սահմանադրական փոփոխությունների մասին խոսելը:
Հարցազրույցն ամբողջությամբ՝ տեսանյութում:
