Ադրբեջանական 1news.az կայքի փոխանցմամբ՝ Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը հայտարարել է, որ Կազանի հանդիպման ժամանակ Հայաստանը «հերթական անգամ չցուցաբերեց» քաղաքական կամք, ինչն անհրաժեշտ էր Մադրիդյան սկզբունքների հիման վրա ղարաբաղյան հակամարտության կարգավորման համար.
«Հայաստանը «շահագրգռված չէ» ղարաբաղյան հակամարտության կարգավորմամբ։ Այդ երկրին համոզելու՝ եթե կարելի է այդպես արտահայտվել, Մինսկի խմբի բոլոր ջանքերն ապարդյուն են անցնում։
Ես չեմ կարծում, թե Կազանի հանդիպումը ղարաբաղյան բանակցային գործընթացի վերջին հանդիպումն է։ Այդպիսի հանդիպումները կշարունակվեն նաև այսուհետ։ Ամեն դեպքում, բանակցությունների պոտենցիալը սպառված չէ»։
Հասանովը նաև ընդգծել է, որ Ադրբեջանը «երբեք» չի հրաժարվի իր տարածքային ամբողջականությունը վերականգնելու իրավունքից. «Յուրաքանչյուր պահի «կարող են սկսվել» ռազմական գործողությունները, սակայն մինչ այդ պետք է սպառվեն բանակցային գործընթացի բոլոր հնարավորությունները»։
Հիշեցնենք, որ օրեր առաջ ռուս քաղաքագետ, Alte Et Certe վերլուծական բյուրոյի ղեկավար Անդրեյ Եպիֆանցևը հայտարարել էր. «Վերջին տարիների ընթացքում արդեն իսկ դիտարկվել են խնդրի դիվանագիտական լուծման հնարավոր բոլոր տարբերակները, և պարզապես անհնար է հնարել ինչ-որ նոր բան: Դրա համար էլ պարզապես անհիմն է խնդրի մաքուր դիվանագիտական լուծման վրա կենտրոնանալը:
Միայն լիակատար հաղթանակի տրամադրված Հայաստանի ու Ադրբեջանի հասարակությունների անհամաձայնության պայմաններում անհրաժեշտ է դառնում ոչ թե խնդրի դիվանագիտական կարգավորման ուղիների փնտրտուքը, ինչն այսօր անհնար է թվում, այլ՝ հասարակությունների շրջաններում ակտիվ աշխատանքներ տանելու խնդիրը: Միջին հեռանկարում դա կարող է արդյունք տալ»։
