ԱՄՆ նախագահ Դոնալդ Թրամփը «հաջողություն է մաղթել» դեմոկրատ-սենատոր Բեռնի Սանդերսին, որը հայտարարել է 2020թ․ ընտրություններում ԱՄՆ նախագահի պաշտոնի համար պայքարին մասնակցելու մտադրության մասին՝ տեղեկացնում է TASS-ը։
«Խելացնոր Բեռնին հենց նոր մրցավազքի մեջ մտավ: Հաջողություն եմ մաղթում նրան»,- փետրվարի 20-ին գրել է Թրամփը Twitter-ի իր էջում:
Հայտարարելով ընտրություններին մասնակցելու իր մտադրության մասին, 77-ամյա Սանդերսն ասել Է. «2016 թվականի ընտրարշավի ժամանակ մենք քաղաքական հեղափոխություն սկսեցինք, եկել է ժամանակը հեղափոխության հետագա զարգացման համար»:
Ավելի վաղ Սանդերսը հայտարարել էր, որ ընտրություններին մասնակցելու որոշում կընդունի միայն այն դեպքում, եթե վստահ լինի, որ կլինի այն «լավագույն թեկնածուն», ով կկարողանա հաղթել Դոնալդ Թրամփին: 2016թ․ Սանդերսն իր թեկնածությունն էր առաջադրել ԱՄՆ նախագահի պաշտոնի համար, բայց Դեմոկրատական կուսակցության փրայմերիզների ընթացքում պարտվեց Հիլարի Քլինթոնին, որը հետագայում համընդհանուր ընտրություններում զիջեց Թրամփին:
Ավելի վաղ Մասաչուսեթսի նահանգից դեմոկրատ սենատոր Էլիզաբեթ Ուորենը իր թեկնածությունն է առաջադրել ԱՄՆ-ի նախագահի 2020թ․ ընտրություններին մասնակցելու համար: Դեմոկրատական կուսակցությունից նախագահի պաշտոնի թեկնածու առաջադրվելու հնարավոր հավակնորդների թվում ամերիկյան ԶԼՄ-ները նշում են նաև ԱՄՆ-ի 76-ամյա նախկին փոխնախագահ Ջո Բայդենին, Նյու Ջերսիի նահանգից սենատոր Քորի Բուքերին և Նյու Յորքի նահանգից սենատոր Քիրսթեն Ջիլիբրանդին: Ապագա նախագահական ընտրարշավի ընթացքում կուսակցական ակտիվիստների առաջին ժողովները տեղի կունենան Այովայի նահանգում 2020թ․ փետրվարի սկզբին: Դեմոկրատական կուսակցության համագումարը, որտեղ պաշտոնապես կառաջադրվի նախագահի պաշտոնի թեկնածուն, կկայանա 2020թ․ հուլիսի 13-16-ը: Համագումարն իրենց մոտ ընդունելու իրավունքին հավակնում են Մայամի Բիչը (Ֆլորիդայի նահանգ), Միլուոքին (Վիսկոնսինի նահանգ) և Հյուսթոնը (Տեխասի նահանգ): Հանրապետականներն իրենց համագումարը կանցկացնեն 2020թ․ օգոստոսին՝ Շառլոտ քաղաքում (Հյուսիսային Կարոլինայի նահանգ): ԱՄՆ նախագահի 59-րդ ընտրությունները կկայանան 2020թ․ նոյեմբերի 3-ին։
