Իսրայելական ISRAland պորտալի փոխանցմամբ՝ նախորդ տարվա մայիսի 31-ին «Մավի Մարմարա»-ի միջադեպի կապակցությամբ ՄԱԿ-ի հանձնաժողովի պատրաստած հաշվետվությունը բարենպաստ է եղել Իսրայելի համար։ ՄԱԿ-ը պատասխանատվության մեծ մասը դրել է Թուրքիայի վրա։
Հաշվետվության սևագիրն արդեն իսկ ներկայացվել էր Իսրայելին ու Թուրքիային, և հարուցել էր Անկարայի զայրույթը։ Դրանում ասվում է, որ Գազայի հատվածի շրջափակումը չի հանդիսանում միջազգային իրավունքի խախտում, ինչը նշանակում է, որ թուրքական «Մավի Մարմարա» նավի գրավումն Իսրայելի օրինական իրավունքն էր։
Հիշեցնենք, որ 2010 թվականի մայիսի 31-ի գիշերը Իսրայելի ռազմածովային ուժերը հարձակում գործեցին «Մեր ուղեգիծը Պաղեստինն է, իսկ բեռը՝ մարդասիրական օգնություն» կարգախոսով վեց նավից բաղկացած «Ազատության նավատորմիղի» վրա, որը 10 տոննա հումանիտար օգնություն էր տանում Գազա:
Հարձակման հետևանքով 16 մարդ սպանվեց, մոտ 30-ը՝ վիրավորվեց: Զոհվածների թվում էին Թուրքիայի 9 պաղեստինամետ քաղաքացիներ: Իսրայելը վստահեցնում էր, որ 6 նավերով Գազայի հատված ուղևորվող շուրջ 700 ակտիվիստները նաև զենք են կրել:
