ՀՀ Կառավարությանն առընթեր պետական եկամուտների կոմիտեն հրապարակել է 2018 թվականի հունվար – դեկտեմբերի արդյունքներով 1000 խոշոր հարկատուների ցանկը, որը գլխավորում է «Գրանդ Հոլդինգ» ընկերությունը՝ պետբյուջե մուտքագրած հարկերի ընդհանուր մոտ 42 մլրդ 222 մլն դրամ ցուցանիշով: Նախորդ տարիներին առաջին հորիզոնականը զբաղեցնող «Գազպրոմ Արմենիա» ընկերությունը զիջել է դիրքը՝ երրորդ տեղում է, երկրորդ տեղում «Զանգեզուրի պղնձամոլիբդենային կոմբինատն» է, որը նախորդ տարվա ցուցանիշը կրկնակի գերազանցել է:
Թեմայի շուրջ «Առաջին լրատվական»- ի հետ զրույցում Հայաստանի գործատուների հանրապետական միության նախագահ Գագիկ Մակարյանը, անդրադառնալով հարցին, թե ինչով են պայմանավորված ցուցանիշների այս փոփոխությունները, նշեց. «Փոփոխությունները կապված են թե՛ քաղաքացիների, թե՛ երկրի տնտեսական վիճակի հետ: «Գազպրոմ Արմենիա»-ի ցուցանիշների նվազումն առաջին հերթին կարող է պայմանավորված լինել նրանով, որ մեղմ ձմեռ է, և գազի ծախսը քիչ է, բացի դրանից՝ հնարավոր է, որ որոշակիորեն միգրացիան է դեր խաղացել. բնակչության քանակը պակասել է: Եվ երրորդ՝ հնարավոր է գազ օգտագործող արդյունաբերական ճյուղերի աշխատանքների նվազեցում է եղել, օրինակ՝ պահածոյի գործարանները ձմռանը չեն աշխատում»:
Իսկ «Զանգեզուրի պղնձամոլիբդենային կոմբինատ»-ի բարձր ցուցանիշները, ըստ Գ. Մակարյանի, պայմանավորված են արտահանման ծավալների մեծացմամբ և միջազգային շուկաներում պղնձի գների բարձրացմամբ:
Հայաստանի գործատուների հանրապետական միության նախագահի խոսքով՝ «Գրանդ Հոլդինգ» ընկերությունը մրցունակ է, ապրանքների սպառման ծավալները և արտահանման ծավալները մեծացել են. «Ծխախոտի գինը երկրներում թանկացնում են, որպեսզի կանխարգելեն ծխելը, բայց ծխողների թիվը չի պակասում, իսկ հայկական ծխախոտը ավելի էժան է և ավելի մրցունակ: Բացի դրանից՝ «Գրանդ Հոլդինգ»-ն իրականացնում է կազմակերպված բիզնես՝ շատ լավ մենեջմենթով, ժամանակակից տեխնոլոգիաներով, միջազգային սերտիֆիկացումով, և դա էլ է բերում նրան, որ ընկերության ընդհանուր եկամուտներն աճում են»:
Մանրամասն՝ տեսանյութում: