ՀԱԿ-ը ներքաղաքական նոր բանավեճ է սկսում՝ առաջարկելով մեկ տարվա ընթացքում իրականացնել սահմանադրական հանրաքվե և վերադառնալ կառավարման կիսանախագահական համակարգին։ Դժվար է ասել, ՀԱԿ-ի նպատակը բուն բանավեճն է, հանրային հիշողության, այսպես ասած, զոնդաժը, թե հիմքում ավելի հեռահար հաշվարկ է և շոշափում է քաղաքական դերակատարների լայն շրջանակի շահեր: Թեմայի շուրջ «Առաջին լրատվական»- ի հետ քննարկմանը մասնակցեցին «Իրազեկ քաղաքացիների միավորում ՀԿ ծրագրերի տնօրեն Դանիել Իոաննիսյանը, քաղաքագետ Արմեն Բաղդասարյանը և ԱԺ «Իմ քայլը» խմբակցության պատգամավոր Վահագն Հովակիմյանը:
«ՀԱԿ-ը միշտ էլ կողմ է եղել կիսանախագահական համակարգին և կտրականապես դեմ՝ կառավարման նախագահական համակարգին: Նրանք շարունակում է պնդել իրենց տեսակետը: Չեմ կարծում, թե կուսակցական շահ կա դրա տակ, իրենց հաշվարկն այն է, որ դրանից պետությունը կշահի»,- այս տեսակետը հայտնեց Ա. Բաղդասարյանը:
Դ. Իոաննիսյանի կարծիքով՝ ՀԱԿ-ի սկսած քննարկումը օգտակար կլինի՝ անկախ եզրահանգումից. «Մենք մի փուլում ենք, երբ կառուցվում է պետություն, և այս քննարկումների շրջանակում արժե հասկանալ՝ ինչպիսի պետություն ենք կառուցում՝ խորհրդարանական հանրապետությո՞ւն, թե՞ կիսանախագահական, և որոնք են հակակշիռների ու ժողովրդավարությունը երաշխավորող մեխանիզմները:
«Կարծիք կա, որ կիսանախագահական մոդելն ավելի լավն է, որովհետև հակակշռում են նախագահը և խորհրդարանը, իսկ խորհրդարանական համակարգի դեպքում փոխադարձ վերահսկողության մեխանիզմները օբյեկտիվորեն կաղում են»,- նշեց Դ. Իոաննիսյանը՝ հավելելով, որ խորհրդարանական համակարգին նախապատվություն տվողներ էլ կան:
Վ. Հովակիմյանի խոսքով՝ ՀԱԿ-ը, ըստ էության, արձագանքել է Կառավարության ծրագրի ընթացքում հնչած կոչին՝ ծավալել բաց բանավեճեր, և հաշվի առնել հանրային պահանջը:
Արմեն Բաղդասարյանի դիտարկմամբ՝ խորհրդարանական համակարգ, ըստ էության, չունենք, իմիտացիա է: Քաղաքագետն ընդգծեց, որ կիսանախագահականին վերադարձը վերադարձ է անցյալին, և այդ համակարգը ևս թերի է ու արատավոր: «Ես կարծում եմ, որ պետք է խորհրդարանական համակարգը պահպանել՝ էապես բարեփոխելով»,- ընդգծեց քաղաքագետը:
Մանրամասն՝ տեսանյութում:
