Ալավերդու պղնձաձուլարանի աշխատակիցները օրերս փակել էին միջպետական երկաթուղին՝ պահանջելով բացատրություն պղնձաձուլարանի ճակատագրի վերաբերյալ։ Նախորդ տարվա նոյեմբերից նրանք հարկադիր պարապուրդի մեջ են։ Լոռու մարզպետ Անդրեյ Ղուկասյանն աշխատակիցների հետ հանդիպմանը նշեց, որ ՎՏԲ բանկը նոր օպերատոր է փնտրում, որը պատրաստ է շահագործել Ալավերդու գործարանն ու Թեղուտի հանքավայրը միաժամանակ։ Երեկ փոխվարչապետ Տիգրան Ավինյանի հետ հանդիպումից հետո աշխատակիցները որոշել են մինչև փետրվարի 28 բողոքի ակցիա չանել։ Այդ մասին «Առաջին լրատվական»-ի հետ զրույցում ասաց Ալավերդու պղնձաձուլարանի աշխատակից Արմեն Կիրակոսյանը։
«Մենք երեկոյան հանդիպեցինք Տիգրան Ավինյանին, նա մանրամասներ ներկայացրեց, և մենք հիմա սպասում ենք հաջորդ քայլերին։ Այս պահին սպառիչ պատասխանն այն է, որ առաջարկությունների փաթեթ ներկայացրել է պղնձաձուլարանի մասով «Վալլեքս»-ը, որը կառավարության միջոցով առաջարկությունները ներկայացրել է բանկին, հիմա մնում է ՎՏԲ բանկի պատասխանը ստանանք», -ասաց նա՝ հավելելով, որ թեև օր չեն նշել վերջնական պատասխանի համար, բայց կառավարության ներկայացուցիչները ասել են, որ խնդրի հետ կապված աշխատում են ամենօրյա ռեժիմով, որ հարցը շատ շուտ լուծում ստանա, առաջարկում են կոմպրոմիսային տարբերակ։
Աշխատակիցները երկաթգիծը բացել են գիշերը ժամը 03։00-ին՝ ակնկալիքով, որ դրական տեղաշարժ կլինի։
Նոյեմբեր ամսից գործարանի 630 աշխատող ունեցող հարկադիր պարապուրդի մեջ է։ Արմեն Կիրակոսյանը նշեց, որ քաղաքի զգալի հատվածն աշխատում է գործարանում և քաղաքը տարիներ շարունակ շնչել և ապրել է այս գործարանով։ Քաղաքում սոցիալական վիճակը, նրա խոսքով, աղետալի է և եթե խնդիրը մինչև փետրվարի 28-ը չլուծվի, խնդիրն էլ ավելի կխորանա, քանի որ մինչև փետրվարի 28-ը հարկադիր պարապուրդի մեջ գտվելու համար ստացել են որոշակի գումաև, իսկ 28-ին այդ ժամկետն էլ է լրանում։
«Մարդկանց մոտ անորոշությունն է մեծացել, սոցիալական խնդիրը մի կողմից, ձմեռը՝ մյուս կողից․․․ մի խոսքով, մենք շատ մեծ խնդիրների առաջ ենք կանգնած։ Մենք հուսով պետք է սպասենք հաջորդ քայլերին, և եթե իհարկե չլինի ինչ-որ դրական տեղաշարժ, այնքան հուսահատ վիճակում է գտնվում ժողովուրդը, որ վաղը նորից դուրս է գալու պայքարի իր իրավունքների, իր սոցիալական խնդիրներին լուծում տալու համար։ Երևի հանրապետության այն եզակի քաղաքներից մեկն է, որը բողոքի ակցիայով ոչ թե քաղաքապետի փոփոխություն կամ դպրոցի տնօրենի փոփոխություն է ուզում, այլ աշխատանք, որ կարողանա աշխատել և իր արդար քրտինքով ապրել»,-ասաց Արմեն Կիրակոսյանը։