Ամերիկյան Apple ընկերության բաժնետոմսերի արժեքը ֆոնդային բորսայում աճել է 1.7%-ով: Ըստ «Ինտերֆաքսի», դա կորպորացիային թույլ է տվել վերականգնել ԱՄՆ-ի ամենաթանկարժեք ընկերության կարգավիճակը:
Արժեթղթերի գնի բարձրացման շնորհիվ Apple-ը կապիտալացումով շրջանցել է իր ամենամոտ մրցակցին՝ Microsoft-ին:
Ներկայումս iPhone-ի արտադրողի կապիտալացումը կազմում է 821.7 միլիարդ դոլար՝ Microsoft-ի 817.4 միլիարդի դիմաց:
Երրորդ հորիզոնականում է աշխարհի ամենահարուստ մարդու՝ Ջեֆ Բեզոսի Amazon-ը, որի կապիտալացումը կազմում է 815.1 միլիարդ դոլար: Քառյակը եզրափակում է Alphabet-ը՝ 791.6 միլիարդ դոլարով:
Չորրորդ եռամսյակի տվյալների բացահայտումից հետո Apple-ի բաժնետոմսերի արժեքը բարձրացել է 12.7%-ով:
Անցյալ տարվա հոկտեմբերին Apple-ը դարձել է առաջին ընկերությունը, որի կապիտալացումը գերազանցել է 1.1 տրիլիոն դոլարը: Սակայն դրանից հետո ընկերության արժեքը նվազել է ԱՄՆ-ի և Չինաստանի միջև առևրային պատերազմի, ինչպես նաև iPhone-ի նոր մոդելի նկատմամբ սպառողական հետաքրքրության անկման վերաբերյալ մտավախությունների առաջացման հետևանքով:
