Ադրբեջանական ANS PRESS-ի փոխանցմամբ՝ ՄԱԿ-ի Գլխավոր ասամբլեան ընդունել է «Աբխազիայից և Հարավային Օսիայից փախստականների ու ներքին տեղահանվածների մասին» բանաձևը՝ պահանջելով հնարավորություն ընձեռել նրանց՝ անվտանգ վերադառնալու իրենց տները։
Ռուսաստանը կտրուկ դեմ է հանդես եկել այդ բանաձևին՝ մյուս երկրներին կոչ անելով դեմ քվեարկել։
Սակայն դա հաջողություն չի ունեցել. բանաձևի օգտին քվեարկել է 57 երկիր, իսկ դեմ՝ 13՝ ներառյալ Ռուսաստանը։ Այս կապակցությամբ ՄԱԿ-ում Վրաստանի մշտական ներկայացուցիչ Կախա Լոմայան հայտարարել է, որ տվյալ բանաձևը չափազանց կարևոր է, քանի որ այն ևս մեկ անգամ հաստատում է Ռուսաստանի կողմից վրացական տարածքների օկուպացման փաստը և իրենց տները վերադառնալու փախստականների իրավունքը։
Հիշեցնենք, որ Վրաստանը վերոնշյալ բանաձևը ՄԱԿ ԳԱ-ի հաստատմանն էր ներկայացրել հունիսի սկզբին։
