Երեկ ԱԺ «Ժառանգություն» խմբակցության ղեկավար Ստյոպա Սաֆարյանը հայտարարել էր, որ ՀԱԿ-ի հետ «Ժառանգության» միավորման թեման վերջնականպես փակված է: Այսօր ՍԴՀԿ ատենապետ Լյուդմիլա Սարգսյանից փորձեցինք հետաքրքրվել, թե ե՞րբ է ՀԱԿ-ի հետ միավորման հեռանկարը օրակարգում եղել, ինչո՞ւ է հենց հիմա փակ, որքանո՞վ է այդ դիրքորոշումը պայմանավորված արտաքին գործոնով, որքանո՞վ կապ ունի իշխանության հետ երկխոսության հեռանկարի հետ, որի իրականացման դեպքում «Ժառանգությունը» առաջիկա խորհրդարանական ընտրություններում կարծես թե դուրս է մնում խաղից:
Նրա խոսքերով, վերջին շրջանում «Ժառանգությունը» շատ ակտիվ հարձակումներ է կատարում Կոնգրեսի վրա: «Հավանաբար, երկխոսության թեման այնքան էլ ժառանգականների սրտով չէ: Ինչո՞ւ. արդյունքում ընդգծվում է երկու քաղաքական լրջագույն ուժ: Դա իշխանական թևն է և ընդդիմադիր հատվածում՝ ՀԱԿ-ը, ինչը, բնականաբար, դուր չի գալիս թե՛ «Ժառանգությանը», թե՛ Դաշնակցությանը և թե՛ այլ քաղաքական ուժերին այն պարզ պատճառով, որ երբ ՀԱԿ-ի հետ համեմատության մեջ են տեսնում իրենց, հասկանում են, որ այստեղ արդեն իրենք չեն կարող լրջագույն դերակատար լինել: Եթե իրականում իրենք պայքարում են երկրում օրինականության հաստատման համար, ապա միայնակ դա չեն կարող անել, հետևաբար, շատ ճիշտ կլիներ, որ ՀԱԿ-ի հետ համագործակցաբար անեին: Եթե կարծում են, որ կկարողանան դաշտում որոշակի ազդեցություն պահպանել նաև միայնակ՝ բարի երթ իրենց: Սակայն ներկա դրությամբ իրենց քայլով պարզապես ջուր են լցնում իշխանության ջրաղացին»,- ընդգծեց Լյուդմիլա Սարգսյանը՝ ավելացնելով, որ, առանց լուրջ տեղեկությունների, չի ցանկանում արտաքին քաղաքական գործոնի հանգամանքը մեկնաբանել։