«Առաջին լրատվական»- ի զրուցակիցն է Աժ «Իմ քայլը» խմբակցության պատգամավոր, ԱԺ փոխխոսնակի թեկնածու Ալեն Սիմոնյանը:
–Այսօր Ձեզ չհաջողվեց ընտրվել ԱԺ փոխխոսնակ, բայց կասկած չկա, որ կընտրվեք:
-Հույս ունեմ, որ կընտրվեմ:
–Յոթերորդ գումարման ԱԺ–ն տարբերվում է նախորդներից մի քանի հանգամանքներով, որոնցից գլխավորը, թերևս, այն է, որ Հայաստանի պատմության մեջ առաջին անգամ խորհրդարանը ձևավորվել է արտահերթ ընտրությունների միջոցով՝ դառնալով հեղափոխության ավարատական ակորդ: Ավարտական ակորդ տերմինը ճի՞շտ է հնչում՝ հաշվի առնելով, որ ԱԺ–ն արդեն, կարելի է ասել, ձևավորված է:
-Կարծում եմ՝ վաղը կլինի վերջնական ակորդը, և կսկսվեն բուն գործընթացները՝ աշխատանքները:
–Ո՞րն է հրատապ հարցը, որով պետք է առաջին հերթին զբաղվի ԱԺ–ն:
-Կառավարության ձևավորումը՝ առաջին նիստերից մեկում: Արդեն իսկ օրակարգում է կառավարության կառուցվածքի հետ կապված հարցը, որը կքննարկվի ԱԺ լիագումար նիսում, և քվեարկությամբ կփոխվի կառավարության կառուցվածքը, կառավարությունը կունենա նոր պատկեր, ինչի մասին ամիսներ շարունակ խոսում էինք:
–Կառուցվածքի փոփոխության մասին նախագիծ, որին շատ քչերն են ծանոթ:
-ԱԺ-ում քննարկումների ժամանակ կտեղեկանան բոլոր նրանք, ովքեր տեղյակ չեն, բայց չեմ կարծում, թե քչերն են ծանոթ, քանզի շատ կարծիքներ են հնչել՝ տարբեր նախարարությունների հետ կապված, նույնիսկ բուռն քննարկում ծավալվեց: Հարցին բազմիցս անդրադարձել է նաև վարչապետը, իսկ վարչապետի եթերներին, հայտարարություններին, բոլորս գիտենք, որ բոլորն ուշի ուշով հետևում են:
–Նախագիծը տեղադրվա՞ծ է որևէ կայքում, և կարող ենք ծանոթանա՞լ:
-Պետք է որ և՛ ԱԺ կայքում, և՛ կառավարության կայքում տեղադրված լինի:
-Նախարարությունների թիվը որքա՞ն կլինի:
-Նախարարությունների թիվը կկրճատվի, 17-ի փոխարեն մենք կունենանք 12 նախարարություն. միգուցե ԱԺ քննարկումների արդյունքում ինչ-որ բան փոխվի, այսինքն՝ ձեր նշած վերջնական ակորդը տեղի կունենա ԱԺ նիստերի դահլիճում: Նախատեսվում է, որ կրթության և գիտության նախարարությունն իր մեջ կներառի նաև մշակույթի, ինչպես նաև սպորտի և երիտասարդության նախարարությունները, Սփյուռքի նախարարությունն այլևս որպես նախարարություն գոյություն չի ունենա, ենթադրում եմ, որ կլինի գերատեսչություն՝ փոխվարչապետներից մեկի ենթակայությամբ, ինչպես նաև ԱԺ-ում կլինի հանձնաժողով: Բայց այս ամենը դեռ նախագծային փուլում է, վաղը ԱԺ-ում կլսենք և՛ իշխանության, և՛ ընդդիմության կարծիքները, կառավարության ներկայացուցիչը վերջնական տարբերակը կներկայացնի:
-Հայտնի՞ է, թե որքան գումար կտնտեսվի օպտիմալացման այդ ծրագրի շնորհիվ:
-Անկեղծ ասած՝ չգիտեմ, բայց վստահ եմ՝ կտնտեսենք, որովհետև թե՛ նախարարությունների, թե՛ տարբեր ՊՈԱԿ-ների պարագայում բավականին ուռճացված աշխատատեղեր կան, որոնք ստեղծվել են ծանոթ-բարեկամներին գործի դասավորելու համար, դա մեր պետությունն այլևս իրեն թույլ տալ չի կարող:
-Այսինքն՝ գումարի տնտեսումը կլինի բացառապես կրճատված անձանց աշխատավարձի հաշվի՞ն:
-Դա չի արվում ինչ-որ մեկին կրճատելու համար, պետության ֆունկցիան նոր աշխատատեղ ստեղծելն է, բայց երբ աշխատատեղը ստեղծված է արհեստականորեն, և հինգ հոգու փոխարեն նույն գործառույթը կարող են կատարել երկու-երեք հոգով և դրանով գումար տնտեսել, պետությանը, երկրի տնտեսությանն օգուտ տալ, կարծում եմ, այդ որոշումը միգուցե դժվար, բայց ճիշտ որոշում է… Օրինակ՝ կա գերատեսչություն, որը ներառում է 12 բաժանմունք, և այնտեղ աշխատում է 500-700 մարդ, բայց նրանց կատարած գործառույթը հնարավոր է իրականացնել մեկ համակարգչով և երկու աշխատակցով: Սա, իհարկե, եզակի օրինակ է: Բայց կան շատ ուռճացումներ: Կարծում եմ կգտնենք բոլոր հնարավոր միջոցները, որպեսզի խնդիր չառաջանա, բոլորն ինչ-որ տեղ տեղավորվեն:
-Ամեն դեպքում անխուսափելի է՞ այդ վիրահատական մեթոդ ասվածի կիրառումը:
-Երկու ընտրություն ունենք՝ կա՛մ մենք թողնում ենք, որ ինչ-որ մեկի բարեկամը ինչ-որ հաստիքում մնա, և դրանով աշխատատեղ ենք ապահովում, բայց պետությունը ծանրաբեռնում ենք և վճարում ենք մի մարդու, որը պետության համար գործ չի անում, այն դեպքում, երբ կարող ենք այդ գումարները խնայել և տրամադրել, ասենք, առողջապահությանը և բանակին: Կարծում եմ՝ օպտիմալացումը միգուցե ցավոտ և վիճելի որոշում կլինի, բայց, այնուամենայնիվ, դա ճիշտ է:
–Վարչապետի լիազորությունները կրճատել պե՞տք է:
-Վարչապետի լիազորությունները, սուպերվարչապետությունը կկրճատվեն, բայց դա չի արվի մեկ օրվա մեջ և կտրուկ ձևով, այլ կարվի հընթացս, սահուն քայլերով: Դրա մասին արդեն խոսել ենք, և, այո՛, չի մնա այն, ինչը մենք քննադատել ենք ժամանակին… Առաջարկները կքննարկվեն հանրության հետ:
-Ձեր թեկնածությունը փոխխոսնակի պաշտոնում «Իմ քայլը» դաշինքի քաղաքական որոշո՞ւմն է, թե՞ նաև Ձեր ցանկությունն են հաշվի առել:
-Բնական է, որ առանց իմ ցանկությունը հաշվի առնելու չէր լինի, իմ թեկնածությունն առաջադրվել է ներքին քննարկումների, կոնսենսուսի միջոցով. առաջարկվել է վարչության կողմից՝ կոնսենսուսով, և ընդունվել է խմբակցության կողմից՝ քվեարկության միջոցով:
-Դեռ շո՞ւտ է գնահատել Հայկ Մարությանի աշխատանքը:
-Իհարկե: Դեռ շուտ է նաև գնահատել նոր իշխանությունների կատարած աշխատանքը:
Հարցազրուցն ամբողջությամբ՝ տեսանյութում:
