Վրացական GHN լրատվական գործակալության փոխանցմամբ՝ Հայաստանի արտգործնախարար Էդվարդ Նալբանդյանը Թբիլիսիում իր վրացի գործընկեր Գրիգոլ Վաշաձեի հետ հանդիպումից հետո հայտարարել է, որ Հայաստանի ու Վրաստանի միջև գոյություն չունեն այնպիսի հարցեր, որոնց կարելի չլինի լուծել բանակցությունների միջոցով.
«Հարևան երկրների միջև գոյություն չունեն հարցեր, որոնց շուրջ հնարավոր չլինի պայմանավորվածություն ձեռք բերել»։
Գրիգոլ Վաշաձեն իր հերթին հայտարարել է, որ Հայաստանն ու Վրաստանը կաջակցեն առկա հարաբերություններին. «Մենք պայմանավորվել էինք հանդիպել տարեկան ոչ թե մեկ, այլ մի քանի անգամ, և իրագործում ենք այդ համաձայնագիրը։ Մենք պետք է հաճախ հանդիպենք, որպեսզի Վրաստանի և Հայաստանի միջև ոչ մի խնդիր չլինի։ Հենց այդ նպատակով ենք հանդիպել ես և իմ հայ գործընկեր Էդվարդ Նալբանդյանը։
Ցանկանում եմ ընդգծել, որ երբեք երկու երկրների միջև այնպիսի հարաբերություններ չեն ձևավորվել, ինչպես որ այսօր։ Դրանում մեծ ներդրում ունեն երկու երկրների նախագահները։ Հանդիպման ժամանակ դիտարկվել են բոլոր այժմեական խնդիրները։
Մենք կոնկրետ քննարկել ենք բարձր մակարդակի մեր այցերը, միջազգային կառույցներում համագործակցությունը, տրանսպորտային, տնտեսական և այլ ոլորտներում մեր հետագա համագործակցության զարգացումը և այլն։ Խոսք է գնացել նաև հումանիտար ասպեկտների, այդ թվում՝ Հայաստանում և Վրաստանում մշակութային շաբաթների անցկացման մասին»։
