Հռոմի պապ Բենեդիկտոս 16-րդը Վատիկանի նոր լրատվական կայքի մասին հայտարարեց Twitter-ի իր միկրոբլոգում: Ընդ որում, այդ հրապարակումը նա արել է ինքնուրույն:
Դատելով Twitter-ի հրապարակումից՝ այն կատարվել է iPad-ով. «Սիրելի բարեկամներ: Ես հենց նոր գործարկեցի News.va կայքը: Օրհնյալ է մեր Տերը Հիսուս Քրիստոս: Ես աղոթում եմ Ձեզ համար և օրհնում: Բենեդիկտոս 16-րդ»,- գրված է Twitter-ի հաղորդագրության մեջ:
Նոր կայքը գործարկվել է այն օրը, երբ նշվում էր Հռոմի պապի ձեռնադրության 60-ամյա հոբելյանը: The New York Times-ը գրել էր, որ կայքի ստեղծման աշխատանքներին 84-ամյա պապն անձամբ է մասնակցել:
Կայքի ստեղծումը համակարգող Կլաուդիա Մարիա Չելան ասել է, որ սա ոչ միայն տեղեկատվական աղբյուր է, այլև լավ միջոց Վատիկանի վարչությունների միջև աշխատանքները կարգավորելու համար: Բացի այժմ գործող vatican.va կայքից, Հռոմի պապ Բենեդիկտոս 16-րդն ունի սեփական ալիքը Youtube-ում: