Վաղը կայանալիք Եվրոպայի լիգայի որակավորման փուլի «Բանանց» (Երևան)-«Մետալուրգ» (Ռուսթավի) հանդիպման նախօրեին երևանյան ակումբի գլխավոր մարզիչ Ռաֆայել Նազարյանը Ավանի ֆուտբոլի ակադեմիայում տեղի ունեցած մամուլի ասուլիսի ժամանակ, պատասխանելով լրագրողների հարցերին, նշեց, որ «Բանանց»-ը ոչ մի ջանք չի խնայի դրական արդյունքի հասնելու համար:
«Բոլորիս ցանկությունն առաջին փուլի արգելքը հաղթահարելն է, և մենք ոչ մի ջանք չենք խնայի դրական արդյունքի հասնելու համար»,- ասաց Նազարյանն ու հավելեց, որ վաղվա խաղում հավասարաչափ կարևոր են թե՛ արդյունքը, թե՛ խաղի որակը:
Անդրադառնալով թիմի խնդիրներին՝ «Բանանց»-ի մարզիչը նշեց, որ երեկ երկկողմանի խաղի ժամանակ վնասվածք է ստացել կենտրոնական պաշտպան Արտաշես Առաքելյանը, որը բաց կթողնի վաղվա հանդիպումը:
Նազարյանը գովեստի խոսքեր ասաց «Բանանց»-ի նոր դարպասապահ, օրեր առաջ ուկրաինական «Մետալուրգ»-ից տեղափոխված Դմիտրի Նեպոգոդովի հասցեին:
«Մարզումների ժամանակ նա շատ լավ տպավորություն է թողել: Այսօրվա մարզումից հետո ամեն ինչ ավելի հստակ կլինի»:
Հիշեցնենք, որ Եվրոպայի լիգայի որակավորման փուլի «Բանանց» (Երևան)-«Մետալուրգ» (Ռուսթավի) հանդիպումը կկայանա հունիսի 30-ին Երևանի «Հանրապետական» մարզադաշտում:
Լուսանկարը` Total football-ի
