ԱՄՆ 44-րդ նախագահ Բարաք Օբամայի կինը ցնցող տպավորություն է թողել՝ ներկայանալով «Սեքսը մեծ քաղաքում» սերիալի դերասանուհի Սառա Ջեսիկա Փարքերին տված հարցազրույցին: Սոցցանցերի շատ օգտատերեր Միշել Օբամայի կրած հագուստը անվանել են 2018-ի հանդերձանք:
Նախկին առաջին տիկինը, որն այժմ ակտիվորեն գովազդում է իր հուշագրությունը, ներկայացել է Balenciaga ապրանքանիշի առջևից բացվածք ունեցող լիմոնագույն զգեստով: Սակայն հանրության վրա մեծ տպավորություն է թողել նույն ապրանքամիշի փայլուն, մինչև ազդրը հասնող բարձրակրունկ երկարաճիտ կոշիկները:
Ոսկեգույն փայլուն կոշիկների արժեքը գրեթե 4000 դոլար է: Դրանք կարվել են Իտալիայում և Balenciaga-ի 2019թ.-ի գարնանային հավաքածուից են: Միշելը կրել է նաև Jennifer Fisher ապրանքանիշի 550 դոլար արժողությամբ ոսկյա ականջօղեր:
54-ամյա Միշել Օբաման վաղուց համարվում է Միացյալ Նահանգների ամենաոճային կանանցից մեկը, սակայն մինչ այժմ նա դասական ոճի կողմնակից է եղել և հազվադեպ է նորաձևութան ոլորտում փորձարկումներ արել:
Շատերը հիացել են տիկին Օբամայի ոճով: «Ես պատրաստ եմ վճարել Միշել Օբամային, որ ինձ այդ կոշիկներով հարվածի», «Միշել Օբամայի տեսքը այդ փայլուն կոշիկներով ակնթարթորեն բուժեց իմ սեզոնային դեպրեսիան», գրել են սոցցանցի օգտատերերը:
Այնուամենայնիվ, գտնվել են մարդիկ, որոնք Միշելի հանդերձանքը չափից դուրս համարձակ են համարել, իսկ ոմանք՝ նույնիսկ անճաշակ:
