Կոտայքի մարզի Չարենցավան քաղաքի թիվ 3 հիմնական դպրոցում տևական ժամանակ է՝ տնօրենի փոփոխության հետ կապված դասադուլ ու անհամաձայնություններ են։ Դպրոցի աշակերտները, ծնողները, ուսուցիչները բողոքի ցույցեր էին անում՝ պահանջելով դպրոցի նախկին տնօրենին վերադարձնել։ Երեկ՝ դեկտեմբերի 12-ին, դպրոց էր գնացել վարչապետ Նիկոլ Փաշինյանը, որը երեխաներին հորդորեց դասի հաճախել։ Փաշինյանի այցից հետո, դպրոցում ուսուցիչները հեռանալու դիմումներ են ներկայացրել, իսկ ծնողները՝ երեխաներին այլ դպրոցներ տեղափոխելու։
Այսօր «Առաջին լրատվական»-ը հենց դպրոցում զրուցեց երեխաների, ծնողների ու նորընտիր տնօրենի հետ։ Այսօր՝ դեկտեմբերի 13-ին, դպրոց հաճախել էին շատ քիչ թվով երեխաներ, որոնցից մի քանիսի հետ կարողացանք զրուցել հենց դպրոցից դուրս գալիս։ Երեխաները մի քանի դասաժամ չէին արել, քանի որ ուսուցիչները նախկին տնօրենի հեռանալուց հետո որոշել են դասի չներկայանալ, այսինքն՝ շարունակել դասադուլը։ Երեխաները մեզ հետ զրույցում պատմեցին, որ շաբաթներ շարունակ դասադուլ են արել և որ իրենք ուզում են դպրոցի տնօրենի պաշտոնում տեսնել նախկին տնօրենին, իրենց խոսքերով ասած՝ ընկեր Կարապետյանին, քանի որ շատ են սիրում նախկին տնօրենին։ Երեխաների խոսքերով՝ իրենց դասարանում շատերն արդեն որոշել են լքել դպրոցը, առաջիկայում էլ չի բացառվում, որ էլի աշակերտներ կտեղափոխվեն։
Զրուցեցինք նաև ծնողներից մեկի հետ, որը հենց մեր նկարահանման պահին դպրոցում պահանջում էր իր երկու երեխաների անձնական գործերը՝ երեխաներին այլ դպրոց տեղափոխելու համար։ Ծնողի խոսքերով՝ քանի դեռ տնօրենը Կարապետյանը չէ, ինքը իր երեխաներին այս դպրոց չի բերի, բացի դրանից՝ որոշ ժամանակ երեխաներին թույլ չի տվել հաճախել դպրոց։
Դպրոցի դասվարներից մեկը մեզ հետ զրույցում ասաց, որ իր 31 աշակերտից կազմված դասարանում միայն մեկ աշակերտ է որոշել տեղափոխվել այլ դպրոց։
Նորընտիր տնօրեն Աննա Բալյանն էլ «Առաջին լրատվական»-ի հետ զրույցում նշեց, որ ծնողների հետ զրուցել է, իրեն վստահեցրել են, որ իր անձի հետ կապված որևէ խնդիր չկա։ Խոսելով երեխաներին դպրոցից տեղափոխելու որոշումների մասին, նորընտիր տնօրեն Աննա Բալյանը կարծում է, որ չպետք է ցավագին ընդունել այն։
Մանրամասները՝ տեսանյութում։
