«Քոչարյանի կալանավորումը և ընտրություններն իրար հետ ոչ մի կապ չունեն և մեկը մյուսով պայամավորելը սխալ է»,- «Առաջին լրատվական»-ի հետ զրույցում ասաց իրավապաշտպան Վարդան Հարությունյանը:
Նրա խոսքով Քոչարյանի խափանման միջոցի ընտրության գործը սկսել էր ընտրություններից շատ առաջ, այն երեկ, ուղղակի, իր հանգուցալուծումը ստացավ:
Ինչ վերաբերում է հնչող կարծիքներին, թե Քոչարյանի կալանավորումը հատուկ էր արված ընտրությունների նախաշեմին, որ իշխանական ուժը դա օգտագործեր հօգուտ իրեն, իրավապաշտպանը նկատեց, որ իշխանական ուժի վարկանիշն այնքան բարձր է, որ այն արհեստական բարձրացնելու կարիք չուներ։
Ինչ վերաբերում է Քոչարյանի փաստաբանների պնդումներին թե սա քաղաքական հետապնդում է և իրենք առանց սպասելու ներպետական ատյաններում գործի քննության ավարտին դիմելու են ՄԻԵԴ, Հարությունյանն արձագանքեց.«ՄԻԵԴ դիմելու իրավունք Քոչարյանի փաստաբաններն ունեն և, կարծում եմ, նրանք կօգտվեն իրենց այդ իրավունքից։ Ցանկացած փաստաբան այդ իրավունքից կօգտվեր, այստեղ որևէ անակնկալ չկա։ Այլ խնդիր է, թե ինչ ընթացք կստանա այդ բողոքը ՄԻԵԴ-ում»:
Իրավապաշտպանի համար ընկալելի է, որ Քոչարյանը փորձում է Մարտի 1-ի արյան պատասխանատվությունը բարդել ներկայիս իշխանության պատասխանատուների վրա.«Շատ հանցագործներ են փարձում իրենց մեղքից հրաժարվել կամ այն այլոց վրա բարդել։ Պատասխանատվությունից խուսափելու ցանկությունը բացատրելի է: Քոչարյանը կարող է փորձել իր առաջ քաշած մեղադրանքները ապացուցել։ Նա դրա հնարավորությունը ունի»,- եզրափակեց իրավապաշտպան Վարդան Հարությունյանը:
