Սպառողների ասոցիացիայի նախագահ Արմեն Պողոսյանը, անդրադառնալով քաղաքային իշխանությունների կողմից կատարված՝ տրանսպորտի հարամարավետության և երթևեկության ուսումնասիրությանը, ասաց, որ դա կոսմետիկ բնույթ էր կրում, և իրենց առաջարկներից չեն օգտվել. «Անմարդկային վիճակով երթևեկելու պատճառներից մեկն այն է, որ ներսում նստատեղերը փոփոխված են։ Կարևոր խնդիր է, որ ճնշված հոգեբանությամբ են մեծանում մեր երեխաները, որոնք հետագայում մեզ պիտի պաշտպանեն։ Սա համամարդկային խնդիր է, և հոգեբանները զարմացած են, որ այս խնդիրը մեզանում դժգոհությունների առիթ չի տալիս»:
Խոսելով տնտեսական օրինաչափությունից՝ Ա. Պողոսյանը նշեց, որ հիմնական թերությունը մեր տնտեսության դիվերսիֆիկացիան է. «Այսինքն` մեկ աղբյուրից կախված չլինելը: Ինչով էլ երթևեկեն մեքենաները, բոլոր վառելանյութերն էլ ներկրվող են, և հնարավոր են ընդհատումներ: Հայաստանն ունի էլեկտրաէներգիայի մեծ պաշար, և այս ուղղությամբ տնտեսական քաղաքականությունը պետք է տանել բալանսավորված»:
Սպառողների ասոցիացիայի նախագահը նաև նշեց, որ պետք է արգելվի միկրոավտոբուսների մուտքը մեր երկիր: Անդրադառնալով մետրոյի սակագնի թանկացմանը՝ Ա.Պողոսյանն ասաց. «Սպառողների համար միանշանակորեն վատ է թանկացումը, կպակասի ուղևորների թիվը, թանկացումը բացասաբար կազդի նաև մեր ընտանեկան բյուջեի վրա»։ Նա նաև հավելեց, որ քաղաքային իշխանության համար դա կարկատանային քաղաքականություն է՝ «սուբսիդիայի կրճատումը չափազանց աննշան կլինի»: Արմեն Պողոսյանը եզրափակեց, որ ներկա իրավիճակը ձեռնտու է 8-28 հոգու, 1.5 միլիոնը տառապում են:
