Այսօր փորձեցինք ճշտել, թե ինչու է հեռուստալրագրող Արտակ Ալեքսանյանը պատրաստվում դուրս գալ Հանրային հեռուստաընկերությունից և տեղափոխվել «ԱրմՆյուզ»: Մեզ հաջողվեց պարզել, որ, իսկապես, Արտակի և նրա ղեկավարության միջև անհամաձայնություններ և խնդիրներ չկան: Լրագրողը Հ1-ի և «Հայլուր» լրատվականի ղեկավարության հետ, ինչպես միշտ, հիմա էլ շատ լավ, ընկերական հարաբերությունների մեջ է:
Երեկ նույնիսկ Հ1-ի տնօրեն Սամվել Ֆարմանյանն է այդ փոփոխության պատճառով ժողով հրավիրել և ասել, թե, ճիշտ է՝ նրան բաց թողնելը դժվար է, բայց իրավիճակն այնպիսին է, որ նա «ԱրմՆյուզը» խելքի կբերի: Սակայն «ԱրմՆյուզից»-ից էլ տեղեկացանք, որ «ԱրմՆյուզը» տնօրեն ունի, ու նրա հեռացման մասին դեռ խոսակցություններ չկան: Հետևաբար՝ ամենայն հավանականությամբ, Արտակ Ալեքսանյանին նշանակելու են ոչ թե տնօրեն, այլ խմբագիր, որի պահանջը ներկա դրությամբ «ԱրմՆյուզում» կա:
Նրա կինը՝ Գոհարը, նույնպես դուրս է գալու Հ1-ից և գնալու ԱրմՆյուզ։ Սակայն «Բանաձև» հեռուստանախագծի ստեղծագործական խումբը շարունակելու է աշխատել Հանրայինի համար։
Մեզ հաջողվեց ճշտել նաև, որ «ԱրմՆյուզը» նախատեսվում է դարձնել NTV-ի նման հեռուստաալիք: Վերազինվում է ոչ միայն աշխատակազմը. հեռուստաալիքում նաև կապիտալ վերանորոգում է իրականացվում:
Թեև վերջնական որոշում չի կայացվել, բայց, ամենայն հավանականությամբ, կիրակնօրյայում Ալեքսանյանին կփոխարինի Արտակ Հերիքյանը: Սկզբնական շրջանում հենց նրան են ցանկացել առաջարկել «ԱրմՆյուզի» հաստիքը, սակայն հասկացել են, որ նա այն ակտիվությունն ու եռանդը չունի, ինչ Արտակ Ալեքսանյանը: Հետևաբար, որոշել են Հ1-ը թողնել Հերիքյանին, իսկ Արտակին տեղափոխել «ԱրմՆյուզ»:
Այլ փոփոխություններ ներկա պահին դեռ չեն նախատեսվում:
