«Առաջին լրատվական»- ի զրուցակիցն է ՀՀ առաջին փոխվարչապետի պաշտոնակատար Արարատ Միրզոյանը:
-Ես անակնկալ եմ համարում ՀՀ վարչապետի պաշտոնակատար Նիկոլ Փաշինյանի ու ԱԱԾ տնօրեն Արթուր Վանեցյանի, ինչպես նաև Վանեցյանի ու ՀՔԾ պետ Սասուն Խաչատրյանի հեռախոսազրույցների գաղտնալսումների հրապարակումը: Դո՞ւք:
-Ո՛չ անակնկալ էր, ո՛չ մեջը լուրջ բովանդակություն կար, ո՛չ էլ սկանդալ էր կամ աշխարհացունց իրադարձություն. հանցագործություն է, դրանով պետք է զբաղվեն պատկան մարմինները:
-Անգամ նախընտրական այս տրամադրությունների վրա ազդեցություն չե՞ք պատկերացնում:
-Վարչապետն արդեն անմիջապես արձագանքել է: Դեռ սեպտեմբերին, առաջին գաղտնալսումից հետո ԱԺ-ում նա անդրադարձել է և ասել, որ կա ավելի մեծ հեռախոսազրույց և ենթադրություն արել, որ զրույցի այդ հատվածներն էլ հնարավոր է նույն գաղտնալսողների կողմից հրապարակվեն: Ընդ որում՝ վարչապետը նաև ասել է, որ զրույցը մոնտաժված է…
-Գոնե հստա՞կ է, թե թիրախը որն է, Մարտի 1-ի գո՞րծը, թե՞ ուրիշ նպատակ են հետապնդում:
-Ես կարծում եմ՝ դա մի ճղճիմ փորձ է՝ վարկաբեկելու գործող իշխանություններին և իշխող քաղաքական թիմին, և բնականաբար ձախողված փորձ է:
-Մի խոսքով՝ «սևի» ու «սպիտակի» պայքար:
-Ես այլ կերպ կձևակերպեի՝ կա 10 քաղաքական ուժի և մետաստազների մեջ հայտնված, ինչ-որ մի կիսաքաղաքական, կիսահանցավոր խմբավորման մրցակցություն: Իրականում քաղաքական պայքարը 10 քաղաքական ուժի մեջ պիտի լինի, և մարդիկ պետք է կողմնորոշվեն և ընտրեն այդ 10-ից, և ինչպես որ նախկինում ֆորմալ մերժել էին այն մյուս ուժին, պետք է մերժումն ամրագրեն և նրանց վերջնականապես դուրս նետեն քաղաքական դաշտից:
-«Իմ քայլին» հասցեագրված մեղադրանքները կմնան նախընտրական շրջանո՞ւմ, թե՞ պետք է հետևանքների սպասել, այդ թվում՝ խոսքս նաև Արցախում պարտվողական քաղաքականություն վարելու մեղադրանքի մասին է:
-Դա մեղադրանք չէ, դա անհեթեթ հերյուրանք է և զրպարտություն: Իմիջիայլոց, այսօր Դավիթ Շահնազարյանին ԱԱԾ էին կանչել հենց դրա համար, որ եթե նա, ինչպես պնդում է, տիրապետում է ինչ-որ դավադրության մասին տեղեկատվության, համաձայն որի՝ քաղաքական թիմը, որն այսօր իշխանության ղեկին է, Արցախը հետ հանձնելու ծրագիր ունի, ապա ԱԱԾ-ին հայտնի այդ տեղեկատվությունը, բայց Դ. Շահնազարյանը չի ներկայացել ԱԱԾ: Մենք մշտապես ասել ենք, որ Արցախի հարցը մեր ամենալուրջ հոգածության ներքո է, Արցախի հարցը չի կարող լուծվել առանց Արցախի և Հայաստանի ժողովրդի կամարտահայտության: Մեր ամենամեծ ջանքերն ուղղված են հենց Արցախի պաշտպանունակության բարձրացմանը և տնտեսության զարգացմանը, ինչի մասին, ի դեպ, Արցախի առաջատար քաղաքական ուժերը ևս հավաստող հայտարարություններ են արել:
–Բացի դրանից՝ Դավիթ Շահնազարյանը հեղափոխության կազմակերպիչներին մեղադրում է դրսից օգնություն ստանալու մեջ, բայց դա նույնպես փաստարկված չէ:
-Իշխանությունների հասցեին ոչ մի լուրջ մեղադրանք չկա, կան մերկապարանոց, անհեթեթ, զրպարտող հայտարարություններ:
-Ըստ Ձեզ՝ ինչո՞ւ է դա Դավիթ Շահնազարյանն անում և ոչ թե ՀՀԿ-ն:
-ՀՀԿ ցուցակի 3-րդ համարն է, ի՞նչ տարբերություն, այդ մարդը ստանձնում է նույն քաղաքական թիմի պատասխանատվությունը:
-Այդ մարդը 2008թ-ին ընդդիմության լիդերների շարքում էր:
-Տեղյակ չեմ, թե որն է փոխակերպման պատճառը: Կան վերլուծաբաններ, ըստ որոնց՝ ոչ մի փոխակերպում չկա, և Շահնազարյանն իրականում ավելի շատ բացահայտել է իր կերպարը և իր նախկին դիրքորոշումները՝ ավելի բացահայտ հանդես գալով: Ցավում եմ, որ այդպիսի անփառունակ ավարտ ընտրեց Դավիթ Շահնազարյանն իր քաղաքական կարիերայի համար:
-ՀՀԿ-ն, փաստորեն, ընտրել է առճակատման տարբերակը և դուք դեմ չեք:
-Այստեղ հավասար քաղաքական ուժերի առճակատում չէ… ՀՀԿ-ում մարդիկ են, որոնց անվան ու իշխանության հետ կապվում է 2 տասնամյակի կոռուպցիան, տնտեսական մենաշնորհները, կեղծված ընտրությունները, անարդարությունները և հազար ու մի հանցագործություն, որոնք դեռ բացահատվում են: Սա մի ամբողջ ժողովրդի և այդ խմբավորման առճակատումն է, նրանց կանոններով ապրելու գաղափարի մերժումն է:
-Արմեն Աշոտյանը որոշել էր Ձեզ դատի տալ, տվե՞ց:
-Մինչև հիմա որևէ ծանուցում չեմ ստացել, բայց հորդորում եմ Աշոտյանին՝ ինձ դատի տալ, որովհետև մենք այդ դեպքում ստիպված կլինենք ՀՀԿ անդամների շրջանում հանցավորների ներգրավվածությունն ապացուցող փաստեր ներկայացնել, և դա կարող է վերածվել յուրօրինակ «Նյուրնբերգյան դատավարության»:
-Մենք սուպերվարչապետական պայմաններո՞ւմ ենք դեռևս ապրում և կառավարվում:
-Համակարգը, որ Սերժ Սարգսյանի «հագով էին կարում», այո՛, սուպերվարչապետական համակարգ է:
-Եվ այն փոխվելո՞ւ է:
-Մենք միշտ խոսել ենք, որ որոշակի փոփոխություններ պետք է արվեն, բայց իհարկե նաև պետք է հաշվի առնել անձանց դերակատարումը: Համաձայն եմ՝ անձանց բարյացակամության վրա հույս դնել չարժի, և պետք է մեխանիզմ մշակվի:
-Խոսքս վերաբերում է նաև Ձեր խոստացած հակակշիռների մեխանիզմին:
-Այո՛: Մենք բազմիցս խոսել ենք այդ մասին, և հիմա նոր խորհրդարանը պետք է գնա այդ ճանապարհով:
Հարցազրույցն՝ ամբողջությամբ տեսանյութում:
