Մաքսային միությանը Հայաստանի անդամակցության արագ տեմպերը շարունակում են զարմացնել Ռուսաստանին։ «Ազատություն» ռադիոկայանի փոխանցմամբ՝ այս մասին երկուշաբթի հայտարարել է Հայաստանում Ռուսաստանի արտակարգ և լիազոր դեսպան Իվան Վոլինկինը։
Հիշեցնենք, հինգշաբթի օրը կառավարության նիստում հաստատվեց Մաքսային միության և Բելառուսի, Ղազախստանի ու Ռուսաստանի միասնական տնտեսական տարածքին Հայաստանի անդամակցության նպատակով միջոցառումների ծրագրի կամ այսպես կոչված «ճանապարհային քարտեզի» իրականացմանն ուղղված գործողությունների ժամանակացույցը:
Ռուսաստանի դեսպանի խոսքով՝ իրենք շարունակում են զարմանալ, քանի որ «անկեղծ ասած, չէին սպասում, որ Հայաստանը այսպես արագ կշարժվի դեպի Մաքսային միություն»։
«Հայաստանը 7 մղոնանոց քայլերով առաջ է շարժվում, միությանը վերջնական անդամակցության ամսաթիվ չեմ կարող ասել, ամեն ինչ ընթացքից է կախված, խնդիրներ, իհարկե, կան, դրանք լինում են լուծվող և չլուծվող, Հայաստանի և Ռուսաստանի միջև բոլոր խնդիրները լուծելի են»,- ասել է դեսպանը։
Այս տարվանից Մաքսային միության հիմնադիր երկիր Ռուսաստանը խստացրեց միգրացիոն օրենքները։ Այսպիսով արդեն հունվարից երկրի տարածքում առանց վիզայի գտնվող քաղաքացիները երեք ամսից ավելի չեն կարող մնալ։ Սա, իհարկե, լուրջ հարված է նաև Հայաստանին, տարեցտարի մեծացող գործազրկության ցուցանիշը ստիպում է մարդկանց դրսում՝ հիմնականում Ռուսաստանում աշխատանք փնտրել, իսկ այս օրենքի գործարկումից հետո փաստորեն այդ հնարավորությունը խիստ նվազում է, քանի որ 3 ամիս աշխատելով հնարավոր է միայն ճանապարհի և կեցության գումարը ապահովել։
Մանրամասները՝ «Ազատություն» ռադիոկայանի կայքէջում:
