Իրանի խորհրդարանի խոսնակ Ալի Լարիջանին հունիսի 30-ին կայանալիք ադրբեջանական այցից առաջ հարցազրույց է տվել ադրբեջանական Trend լրատվական գործակալությանը, որում անդրադարձել է երկու երկրների փոխհարաբերություններին և ղարաբաղյան հակամարտության կարգավորմանը.
«Իրանի և Ադրբեջանի միջև հարաբերությունները գտնվում են բարձր մակարդակի վրա։ Ադրբեջանը Իրանի հարևանն է, այն մուսուլմանական և եղբայրական երկիր է։ Իրանի և Ադրբեջանի միջև «գոյություն ունեն» խոր արմատներ ունեցող պատմական կապեր։ Վերջին տարիների ընթացքում երկու երկրների միջև շարունակում են զարգացում ապրել քաղաքական, տնտեսական, մշակութային ու հասարակական կապերը։
Երկու երկրները հանդիսանում են Իսլամական կոնֆերանս կազմակերպության (ԻԿԿ, որը ներկայումս վերանվանվեց Իսլամական համագործակցության կազմակերպություն) և Միջազգային խորհրդարանական միության անդամներ, որոնցում նրանք սերտորեն համագործակցում են միմյանց հետ»։
Ղարաբաղյան հակամարտության կարգավորման հետ կապված՝ Լարիջանին նկատել է. «Մենք նախկինում էլ ենք ասել, և հիմա էլ ասում ենք, որ տարածաշրջանային խնդիրները պետք է լուծվեն տարածաշրջանի ներսում բանակցությունների անցկացման միջոցով։ Փորձը ցույց է տալիս, որ երբ տարածաշրջանային խնդիրների կարգավորման գործընթացում ներգրավվում են մեծ երկրները, ապա դրանք ձգձգվում են։ Մեծ երկրներն իրենց շահերն են հետապնդում այդ հարցում։
ԵԱՀԿ Մինսկի խումբն արդեն երկար տարիներ բանակցում է ղարաբաղյան հակամարտության կարգավորման շուրջ։ Իսկ ո՞ւր են արդյունքները։ Ինչպե՞ս նրանք վերաբերվեցին այդ խնդրի լուծմանը։ Այդ տեսանկյունից մենք հիմնավոր ենք համարում այն, որ նմանատիպ խնդիրների շուրջ բանակցությունները կարող են ավելի արդյունավետ լինել ներտարածաշրջանյին մակարդակով։ Տարածաշրջանի երկրներն ավելի լավ են ճանաչում միմյանց»։
Հիշեցնենք, որ Իրանը միայն մեկ անգամ (1992) է փորձել ղարաբաղյան հակամարտության կարգավորման գործընթացում հանդես գալ միջնորդի դերում։
