Աջափնյակ և Դավթաշեն վարչական շրջանների ընդհանուր իրավասության դատարանում Մարինե Մելքոնյանի նախագահությամբ սկսվում է Հովհաննես Միքայելյանի և Գայանե Հարությունյանի գործի դատավարությունը:
Հովհաննես Միքայելյանը «Հովիկ Միքայելյան» ՍՊԸ տնօրենը լինելով, ըստ առաջադրված մեղադրանքի, նախնական համաձայնության է եկել Գայանե Հարությունյանի հետ. նրանք «Հացատուն» սննդի օբյեկտի երկու առանձնասենյակները կահավորելուց հետո 6 հազար դրամով պարբերաբար տրամադրել են մարմնավաճառուհիներին՝ հաճախորդների հետ գումարի դիմաց սեռական հարաբերություններ ունենալու համար, այսպիսով՝ նպաստելով նրանց կողմից պոռնկությամբ զբաղվելուն:
Միքայելյանը և Հարությունյանը, առաջադրված մեղադրանքի համաձայն, կազմակերպել են նաև հացատան մատուցողուհիներ Հ.-ի ու Բ.-ի ինտիմ հանդիպումները հաճախորդների հետ:
55-ամյա Հովհաննես Միքայելյանին և 46-ամյա Գայանե Հարությունյանին մեղադրանք է առաջադրվել պոռնկությանը նպաստելու համար՝ ՀՀ քրեական օրենսգրքի 262 հոդվածի 2-րդ մասի 1-ին և 5-րդ կետերով:
Որպես նրանց խափանման միջոց՝ կիրառվել է գրավը:
