Կանացի փոքր պայուսակը, որը պատկանել է Մեծ Բրիտանիայի նախկին վարչապետ Մարգարետ Թետչերին և դարձել է նրա «երկաթյա կառավարաման» ոճի խորհրդանիշը, վաճառվել է Լոնդոնում Christie’s աճուրդների տանը 25 հազար ֆունտ ստերլինգով:
Թետչերն ինքն է նվիրաբերել Asprey ընկերության կողմից արտադրված պայուսակը աճուրդի հանելու համար: Չի նշվում, թե ուր են ուղղվելու այդ գումարները: Մասնագետները նշում են, որ պայուսակը շատ ավելի ցածր գնով է վաճառվել, քան կանխատեսում էին մինչև վաճառքը (մասնագետները կարծում էին, որ այն կվաճառվի 100 հազար ֆունտով):
80-ականներին Մեծ Բրիտանիայի վարչապետը հաճախ էր կրում այս պայուսակը: Այն «ներկա» է գտնվել ԱՄՆ նախագահ Ռոնալդ Ռեյգանի և ԽՍՀՄ նախագահ Միխայիլ Գորբաչովի հետ կայացած հանդիպումների ժամանակ: Հաճախ այդ պայուսակն անվանում էին «գաղտնի զենք»: Թետչերը հանդիպումների ժամանակ այն դնում էր սեղանին և միջից հանում մի թուղթ, որի վրա միշտ լինում էր համոզիչ փաստարկ:
