ԱՄՆ հատուկ ծառայությունների նախկին աշխատակից Էդվարդ Սնոուդենին Ռուսաստանում ժամանակավոր ապաստան տրամադրելու մասին փաստաթղթերի գործողության ժամկետը հնարավոր է երկարաձգվի: Այս մասին հաղորդում է The New York Times-ը` վկայակոչելով միջազգային գործերի հարցերով ՌԴ Պետդումայի կոմիտեի նախագահ Ալեքսեյ Պուշկովին, որը նման հայտարարությամբ հանդես է եկել Դավոսում Համաշխարհային տնտեսական համաժողովի շրջանակներում:
Պարբերականի տվյալներով` Պուշկովն ակնարկել է, որ Ռուսաստանը կարող է «հավերժ» երկարաձգել Սնոուդենին ապաստան տրամադրելու մասին փաստաթղթի ժամկետը:
«Նրան Ռուսաստանից չեն արտաքսի: Որոշում պետք է կայացնի Սնոուդենը»,- ասել է Պուշկովը:
Պատգամավորը նաև հիշեցրել է՝ Սնոուդենի հայրը կարծում է, որ իր որդին արդար դատավարության հույս չի կարող ունենալ հայրենիք վերադառնալու դեպքում:
