«Մեր խնդիրն այն է, որ օդում կախված սոցիալ-դեմոկրատիայի գաղափարները, որոնք մարմնավորման կարիք ունեն Հայաստանում, առավելապես հասու դառնան հանրությանը, և մենք դառնանք այդ գաղափարները կրող ուժը»,- «Առաջին լրատվական»-ի հետ զրույցում ասաց «Քաղաքացու որոշում» սոցիալ- դեմոկրատական կուսակցության համամասնական ցուցակի երկրորդ համար Արտակ Կիրակոսյանը։
Նա վստահ է, որ անկախ կարճ ժամանակահատվածից՝ իրենք կկարողանան, աշխատելով թիրախային մասսայի հետ, հայտնվել խորհրդարանում:
«Մենք խոսում և աշխատում ենք կոնկրետ մասսայի հետ։ Մարդիկ կա՛մ հասկանում են մեր գաղափարները, կա՛մ ոչ։ Ունենք թիրախային խումբ, որի հետ աշխատում ենք, և նրանք այն մարդիկ են, որոնց համար սոցիալական արդարության խնդիրն ընկալելի է, և ձգտում ունեն այդ գաղափարները մարմնավորելու։ Այդ բոլոր մարդիկ մեր ընտրողներն են, նրանք բավականին շատ են ու ժամանակի ընթացքում ավելի կշատանան»,- ասաց Կիրակոսյանը։
Մեր զրուցակցի խոսքով՝ անկախ ամեն ինչից՝ այս ընտրությունները կլինեն լեգիտիմ, իսկ իրենք իրենց քարոզարշավն անցկացնելու են այն տրամաբանությամբ, կարծես թե Ընտրական օրենսգիրքը փոխվել է, չկա ռեյտինգային համակարգ։
Կիրակոսյանի խոսքով՝ «Քաղաքացու որոշում» կուսակցությունը իր նախընտրական ծրագրում շեշտադրում է տնտեսական ոլորտը, մարդու իրավունքների պաշտպանության ոլորտը, կրթության ոլորտը։ «Մարդու իրավունքները առանձին մի բլոկ է, որտեղ մեր պատկերացումներն են այն մասին, թե ինչ պարտավորություններ պետք է ստանձնի պետությունը՝ ուղղված մարդու իրավունքների պաշտպանությանը։ Մենք չպետք է մարդու իրավունքների արժեքների ներկրող լինենք։ Մենք ինքներս պետք է ձևավորենք մարդու իրավունքների օրակարգը։ Ես ինչ-որ ֆանտաստիկ բան չեմ ասում։ Դրա փորձն արդեն կա, և մենք կարող ենք գտնել մեզ հատուկ, բայց նաև ժողովրդավարությանը հատուկ եղանակներ»,- ասաց Արտակ Կիրակոսյանը։
Առավել մանրամասն՝ տեսանյութում:
