Ավելի վաղ տեղեկացրել էինք, որ այսօր Երևանում ընթացող Սևծովյան տնտեսական համագործակցության խորհրդարանական վեհաժողովի 52-րդ նիստում բավական ուշագրավ միջադեպ է տեղի ունեցել։ Երբ համաժողովը վարող ՀՀ ԱԺ նախագահ Արա Բաբլոյանը հայտարարեց, որ բոլոր ազգային պատվիրակությունները պարգևատրվելու են կազմակերպության 25-ամյակի առթիվ, համաժողովի երեք՝ Վրաստանի, Ադրբեջանի, Թուրքիայի պատվիրակությունները հայտարարեցին մեդալներից հրաժարվելու մասին։
«Առաջին լրատվական»-ի հետ զրույցում ԱԺ աշխատակազմի ղեկավարի տեղակալ Արսեն Բաբայանը, մեկնաբանելով միջադեպը՝ ասաց. «Վրաստանի, Ադրբեջանի և Թուրքիայի կողմից մեդալներից հրաժարվելը որևէ առնչություն չունի Հայաստանի հետ։ Նշված երկրների հրաժարվելու պատճառները իրենց և ՍԾՏՀ ԽՎ քարտուղարության քննարկման առարկան են»։
Արսեն Բաբայանը հավելեց՝ ամեն պետություն հրաժարվելու իր առանձին պատճառաբանությունն ուներ. «Մեդալները տրվում էին Հայաստանում, որովհետև նախագահող պետությունը Հայաստանն էր՝ մեր մասնակցությունն ու առնչությունը հարցին սահմանափակվում էր դրանով»։
