ՀՀԿ պատգամավորության թեկնածու Արտակ Զաքարյանը նշում է՝ իրենք փորձելու են 12 օրերի ընթացքում ներկայացնել իրենց հիմնական անելիքը խորհրդարանում որպես ընդդիմություն: «Բացառությամբ մեկ-երկու ոլորտի՝ մնացած բոլոր ոլորտներում առաջ են եկել մտահոգություններ պետության և ապագայի նկատմամբ, պետության կայուն զարգացման ծրագրերի, Արցախում ունեցած մեր ամուր դիրքերի հարցում անհասկանալի նահանջ արձանագրելու ուղղությամբ»,- «Առաջին լրատվական»-ի հետ զրույցում ասաց նա։
Արտակ Զաքարյանն ընդգծեց՝ իրենք հանրահավաքներ չեն անելու, քարոզչության հարթակ կընտրեն մեդիան, ինչպես նաև քաղաքացիների հետ անհատական շփումները. «Ոչ թե խուսափում ենք, այլ այդ մարտավարությունը չենք նախընտրում։ Հանրահավաքը մեզ ի՞նչ է տալու։ Դպրոցական ծրագրի պարտադիր առարկա չէ»։
Զաքարյանը հավելեց. «Կան մարդիկ, որոնք մտահոգված են, այցելում են շտաբներ, փողոցում մոտենում ու ասում են, որ աջակցում են, ասում են՝ ուզում ենք խորհրդարանում լինեք, որ հակակշռեք»։
Ինչ վերաբերում է սև ու սպիտակ պաստառներին, մեր զրուցակիցը նշեց. «Սև ու սպիտակը նախ՝ որոշակի կոնտրաստ է, և հետո՝ մենք չենք հնարել, մեր գործընկեր իշխանությունն է հնարել։ Մենք ընդունել ենք կանոնը. եթե իրենք իրենց սպիտակ են համարում ու 7 ամսում այսքան թերություններ գործում, թող շարունակեն լինել սպիտակ, մենք սևի դիրքերից մեր քաղաքական խաղը կկազմակերպենք՝այնպես, որ շախմատում բոլորս հաղթած դուրս գանք»։
Հարցազրույցն ամբողջությամբ՝ տեսանյութում:
