Շիրակի մարզի Անի համայնքի կենտրոն Մարալիկ քաղաքում ամիսներ շարունակ բողոքի ցույցերը համայնքապետ Արտակ Գևորգյանի հրաժարականի պահանջով, կարելի է ասել արդյունք տալիս է։ Բողոքի ցույցերի գագաթնակետին, երբ Մարալիկ համայնքի ու հարակից խոշորացված բնակավայրերի բնակիչները փակել էին համայնքապետարանի մուտքը՝ կաթվածահար անելով աշխատանքը, գործին միջամտեց Պետական վերահսկողական ծառայության պետ Դավիթ Սանասարյանը։ Վերջինիս այցելությունից հետո համայնքապետարանում սկսվեցին ստուգումներ։ Դավիթ Սանասարյանը պարբերաբար տեղեկացնում էր, որ ստուգումների ընթացքում հայտնաբերվել են խախտումներ, չարաշահումներ և ստուգումների արդյունքում արձանագրված փաթեթն ուղարկվել է Քննչական կոմիտե։
Եվ ահա, ՀՀ Քննչական կոմիտեն պաշտոնապես տեղեկացնում է, որ նախնական տվյալներով՝ Անիի համայնքապետարանի մի խումբ պաշտոնատար անձինք յուրացնելու եղանակով, իրենց վստահված պետական միջոցների առանձնապես խոշոր չափերով գույքի հափշտակություն կատարելու վերաբերյալ նախնական համաձայնությամբ, իրենց պաշտոնեական դիրքը ծառայության շահերին հակառակ օգտագործելով, շահադիտական դրդումներով, օգտագործելով պաշտոնեական դիրքը, առերևույթ կատարել են յուրացումներ:
Ավելի մանրամասն՝ նյութական միջոցների շարժին վերաբերող պաշտոնեական փաստաթղթերում ակնհայտ կեղծ տեղեկություններ մտցնելով՝ 2013 թվականից մինչև 2018 թվականի հոկտեմբեր ընկած ժամանակահատվածում համայնքապետարանի հաշվեկշռում գտնվող տրանսպորտային միջոցներին հասանելիք վառելիքից ավել են ծախսագրել:
Բացահայտված տվյալների համաձայն՝ ավել է ծախսագրվել ընդհանուր առանձնապես խոշոր չափերով` 2.550 լիտր բենզին, 3 մլն 767 հազար 090 ՀՀ դրամի արժեքով սեղմված գազ, ինչպես նաև «ԳԱԶ-53» մակնիշի ավտոմեքենայի համար դուրս է գրվել 400 հազար դրամ կապիտալ վերանորոգման գումար այն դեպքում, երբ հիշյալ ավտոմեքենան փաստացի չի վերանորոգվել, և այդ ամենը յուրացման եղանակով հափշտակվել է:
Բացի այդ, չարաշահելով իրենց պաշտոնեական դիրքը՝ համայնքապետարանի պաշտոնատար անձինք մեկ այլ պետական հիմնարկում փաստացի աշխատող քաղաքացուն ընդունել են աշխատանքի որպես վարորդ և 2013 թվականից մինչև 2018 թվականի հունիս ամիսն ընկած ժամանակահատվածում աշխատավարձի տեսքով նրան վճարել 4 միլիոն 327 հազար 302 ՀՀ դրամ գումար՝ պետությանը պատճառելով առանձնապես խոշոր չափերի նյութական վնաս:
Նկատի ունենալով, որ նախապատրաստված նյութերն առերևույթ պարունակում են պաշտոնեական լիազորությունները չարաշահելու, խոշոր չափերով յուրացում և պաշտոնեական կեղծիք կատարելու հատկանիշներ՝ ՀՀ քննչական կոմիտեի Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 314-րդ հոդվածի 1-ին մասով, 308-րդ հոդվածի 2-րդ մասով և 179-րդ հոդվածի 3-րդ մասի 1-ին կետով:
«Առաջին լրատվական»-ի հետ զրույցում համայնքի ղեկավար Արտակ Գևորգյանը որևէ մեկնաբանություն չտվեց և փոխանցեց իր փաստաբանի տվյալները գործի մանրամասների համար։ Արտակ Գևորգյանի փաստաբանը Արամայիս Հայրապետյանն է։ Մեզ հետ զրույցում փաստաբանն ասաց՝ Արտակ Գևորգյանը որևէ կարգավիճակ չունի, Քննչական կոմիտե չի հրավիրվել։
«Մենք գործի նյութերին ծանոթ ենք այնքանով, որքանով պաշտոնական հաղորդագրություն է տարածվել։ Մեզ գործի նյութեր չի տրամադրվել։ Ես ընդհանրապես չեմ կարծում, որ հրապարակումը Արտակ Գևորգյանին վերաբերելի է։ Այդտեղ անուն գրված չէ, միայն գրված է որոշակի անձանց կողմից։ Ես՝ որպես նրա փաստաբան, որևէ ինֆորմացիայի չեմ տիրապետում, որից ելնելով կարող եմ ասել, որ Արտակ Գևորգյանը կարող է առնչություն ունենալ այդ հրապարակման հետ»,- տեղեկացրեց փստաբանը, ապա ավելացրեց՝ Արտակ Գևորգյանն այս ընթացքում հրավիրվել է միայն ոստիկանություն այն էլ մի գործի շրջանակում, որը կապ չունի Քննչական կոմիտեի հայտարարության հետ:
