Արտահերթ խորհրդարանական ընտրություններին մասնակցության հայտ են ներկայացրել 11 քաղաքական ուժ, այդ թվում նաև նորաստեղծ։
Բոլորն ակնկալում էին, որ դուք «Սասնա ծռերի» հետ միասին դաշինքով կմասնակցեք ընտրություններին, սակայն դուք առանձին մասնակցության հայտ ներկայացրեցիք։ Ո՞վ է լինելու ձեր ընտրողը, հասարակության ո՞ր շերտերից եք սպասում աջակցություն, որոնք կկիսեն ձեր գաղափարները «Առաջին լրատվական»-ի հարցին Հայաստանի «Քրիստոնեա-ժողովրդավարական վերածնունդ» կուսակցության նախագահ Լևոն Շիրինյանը պատասխանեց․ «Էդ թյուրըմբռնումը չգիտեմ՝ ինչի է տարածվել։ Իհարկե, մենք մերձ ենք, բայց ինչու պիտի միասին լինենք, հասկանալի չի։ Ո՞վ է լինելու մեր ընտրազանգվածը։ Կարող եմ ասել՝ արքետիպային հայը։ Ինչո՞ւ։ Որովհետև տվյալ կուսակցությունը, որպես քրիստոնեության վերածննդի կուսակցություն, նպատակ ունի վերականգնել հայ ժողովրդի մշակութային քաղաքակրթական ինքնությունը։ Այսինքն՝ էդ իմաստով այս կուսակցությունը բացառապես տարբեր է մնացած բոլոր կուսակցություններից՝ լիբերալ չի, սոցիալիստական չի և այլն։
Հիմքը հայկական մշակույթն է, քաղաքակրթությունն է, որը գնում է դարերի խորքը, իսկ մեկնաբանության հիմքը՝ մեր եկեղեցու դավանանքի փիլիսոփայությունն է՝ չլինելով կրոնական կառույց։
Իսկ ընդհանուր առմամբ՝ նա ազգային քաղաքական պահպանողական այն հոսանքն է, որը ձևավորվել է 19-րդ դարում։ Հետևաբար, որևէ մեկի հետ դաշինք ձևավորելը բացառված է»։
«Մենք պահպանողական ենք արդիական մեկնաբանությամբ։ Մեր նկատառումները մշակված են համաշխարհային քաղաքագիտական ընդհանուր ֆոնի և եզրակացությունների վրա։ Մենք ազգային ենք այնքանով, ինչքանով մեր եկեղեցին։ Հայ եկեղեցին հայտնի է որպես ազգային եկեղեցի, բայց նա ընդհանուր քրիստոնեական աշխարհի բաղադրիչ է։ Էնպես որ, էնքան էլ ազգային չենք։ Ամեն ինչ արդիական է, բայց բազավորված է դարերի խորքի, արքետիպի վրա»,- հավելեց Լևոն Շիրինյանը։
Ամբողջությամբ՝ տեսանյութում։
