Սպառողների ասոցիացիայի նախագահ Արմեն Պողոսյանից հետաքրքրվեցինք, թե ինչ վիճակում են հայաստանյան հանգստավայրերը սպառման իմաստով:
Ի պատասխան նա արձագանքեց, որ մեր երկիր, ըստ պաշտոնական վիճակագրության, տարեկան 610 հազար այցելու է եղել, որոնց պայմանական անվանում են տուրիստ՝ զբոսաշրջիկ: Սակայն նրանց միայն 15 տոկոսն է հյուրանոցից օգտվում: «Ցանկանում եմ ասել, որ տարբեր պատճառներով Հայաստան այցելած քաղաքացիներին մեխանիկորեն անվանում են տուրիստներ: Այնինչ, զբոսաշրջիկ համարվում է այն մարդը, որը եկել է երկիր, մնացել է 1 օրվանից ավելի և մեկ տարուց պակաս և այն էլ՝ ոչ կոմերցիոն նպատակով»:
Արմեն Պողոսյանն առանձնացրեց երկու պատճառ, որոնց արդյունքում մեր երկրում տուրիզմը ֆիզիկապես և ըստ էության չի զարգանում: Բացի այդ, այն ծավալով, որ տարեկան գալիս են մեզ մոտ տարբեր երկրներից, այդ ծավալով էլ մեր երկրից տարեկան մեկնում են Քոբուլեթի, Բաթումի, չհաշված մյուս երկրները:
«Պատճառներից առաջինն այն է, որ սպասարկման որակն ու կուլտուրան շատ հեռու են բավարար լինելուց: Օրինակ՝ քաղաքակիրթ վերաբերմունքը հստակ երևում է: Իսկ մեր կադրերը ուսուցում չեն անցել, բավականաչափ պատրաստ չեն:
Հիասթափության գործում մեծ դեր են խաղում նաև հավելավճարները: Օրինակ՝ դու հանգստյան գոտում հանգստանում ես, բայց բիլիարդից օգտվելու համար առանձին պետք է վճարես:
Սանիտարահիգիենիկ պայմանները ևս չափազանց հեռու են բավարար լինելուց: Սակայն խոսքը ոչ բոլոր հանգստյան տների միասին է:
Եվ այս ամենով հանդերձ՝ գներն էլ այնքան թանկ են, որ տեղաբնակների համար ավելի մատչելի է հարևան Վրաստանում հանգստանալը, քան մեր երկրում»,- եզրափակեց Արմեն Պողոսյանը: