2017 թվականի Հայաստանի 10 լավագույն մարզիկների ընտրությունները քննարկման լայն առարկա դարձան: Շատերն այն կարծիքին են, որ ազգաբնակչության շրջանում sms քվեարկությունն այնքան էլ արդար չէ: Քվեարկության վերաբերյալ իր դժգոհությունն էր արտահայտել նաև Օլիմպիական խաղերի չեմպիոն, աշխարհի բազմակի չեմպիոն, 2016 թվականի Հայաստանի լավագույն մարզիկ Արթուր Ալեքսանյանը: «Ես համաձայն չեմ այս արդյունքների հետ: Ունեինք աշխարհի, Եվրոպայի մեդալակիրներ, որոնք դուրս մնացին այս ցուցակից: Երևի թե սխալ են կազմակերպել քվեարկությունը: Եթե սպորտի փոխնախարարն ասում է՝ արդար է, դրա արդարը որն է… Եթե աշխարհի մրցանակակիրը չի լինում 10 լավագույնների մեջ, մենք էլ ոչ Ռուսաստան ենք, ոչ էլ Ամերիկա, որ ունենանք աշխարհի 20 մեդալակիր: Ընդամենը տասը լավագույն է ընտրվում, պետք է արժանի մարզիկներն ընդգրկվեն այդ ցուցակում»,- ասել էր Ալեքսանյանը:
Հիշեցնենք, որ մարզական լրագրողների և հասարակության շրջանում անցկացված քվեարկության արդյունքներով՝ 2017 թվականի լավագույն մարզիկ էր ճանաչվել ֆուտբոլի Հայաստանի ազգային հավաքականի ավագ Հենրիխ Մխիթարյանը: Վերջինս sms քվեարկությունում հաղթել էր ձայների ճնշող մեծամասնությամբ: Այս տարի Մխիթարյանը իր ելույթներով չփայլեց «Արսենալում» և Հայաստանի ազգային հավաքականում, և 2019 թվականի լավագույն մարզիկ դառնալու նրա հնարավորություններն այնքան էլ բարձր չեն:
Կարծում ենք՝ ակնհայտ է, որ այս տարի տարվա մարզիկ կոչման միակ իրական հավակնորդը ծանրորդ Սիմոն Մարտիրոսյանն է, որը Թուրքմենստանում կայացած աշխարհի առաջնությունում ֆանտաստիկ արդյունք գրանցեց՝ սահմանելով նաև 3 համաշխարհային ռեկորդ: Մարտիրոսյանի փայլուն արդյունքը և նրա լավագույնը դառնալու հավանականությունը չի նշանակում, որ 10 լավագույն մարզիկների ընտրությունը պետք է անցկացվի անցյալ տարվա ֆորմատով: Մասնավորապես, sms քվեարկությունը ուղղակի տակնուվրա է անում լավագույն մարզիկների տասնյակը: Կան մարզիկներ, որոնց ցույց տված արդյունքների մասին հասարակությունը ողջ ծավալով տեղեկացված չէ: Ավելի ստույգ՝ նախորդ տարվա քվեարկությունը ցույց տվեց, որ մեր համերկրացիները մասնավորապես քվեարկում են իրենց սիրելի մարզաձևը ներկայացնող մարզիկի օգտին:
10 լավագույն մարզիկներից զատ՝ վերջին տարիներին Հայաստանում բազմաթիվ քննարկումներ են եղել, թե որոնք են ամենատարածված մարզաձևերը հանրապետությունում: Այդ հարցում պատկերը զգալիորեն հստակեցնում է Google-ի որոնողական համակարգը, որը թույլ է տալիս պատկերացում կազմել, թե Հայաստանում որ մարզաձևերի նկատմամբ է ամենամեծ հետաքրքրությունն ազգաբնակչության կողմից: Իսկ պատկերը հետևյալն է.
1. Ֆուտբոլ – 2.100.000 հիշատակում
2. Շախմատ – 1.380.000
3. Բասկետբոլ – 419.000
4. Թենիս (մեծ և սեղանի) – 389.000
5. Բռնցքամարտ – 316.000
6. Ըմբշամարտ – 232.000
7. Լող – 214.000
8. Հոկեյ (տափօղակով և խոտի միասին) – 188.000
9. Ծանրամարտ- 185.000
10. Գեղասահք- 128.000
Մյուս մարզաձևերը հիշատակվել են 100 հազարից քիչ: Ու փաստորեն Google.am-ի արդյունքները վկայում են այն մասին, որ այսօր հասարակության շրջանում ֆուտբոլը դուրս է: Կարելի է ասել, որ Google.am-ը ըստ էության արտացոլում է անցյալ տարվա 10 մարզիկների լավագույն եռյակը:
Հիշեցնենք, որ երկրորդ հորիզոնականը զբաղեցրել էր Արթուր Ալեքսանյանը, իսկ լավագույն եռյակը եզրափակել էր Լևոն Արոնյանը: Google.am-ի արդյունքներով՝ 3-րդ և 4-րդ հորիզոնականները զբաղեցրած բասկետբոլը և թենիսը 10 լավագույն մարզիկների քվեարկությունում ներկայացուցիչներ չեն ունեցել:
Վիճակագրական այս տվյալները ցույց են տալիս, որ Հայաստանում հասարակության կողմից մեծ է հետաքրքրությունը թիմային և խաղային մարզաձևերի նկատմամբ: Մատների վրա կարելի է հաշվել, թե տարվա կտրվածքով քանի անգամ մարզասերը կարող է ներկա գտնվել թիմային ուշագրավ հանդիպման՝ երկրպագելով իր սիրելի ակումբին: Թերևս ֆուտբոլի ազգային թիմն է, որ Երևանում անցկացնելով 5-8 հանդիպում՝ մարզադաշտ է բերում միջինը 10 հազար մարզասերների:
ՀՀ սպորտի նախարարությունը լավագույն մարզիկների այս տարվա ընտրության ֆորմատի կապակցությամբ դեռևս վերջնական հայտարարություն չի տարածել: Հին ֆորմատով քվեարկություն անցկացնելու պարագայում, կարծում ենք, կրկին կլինեն դժգոհություններ: Հիշեցնենք, որ մինչև 2017 թվականը լավագույն տասնյակը որոշում էին բացառապես մարզական լրագրողները: Վերջիններիս կարծիքը հաշվի առնելը, կարծում ենք, ճիշտ է, բայց անհրաժեշտ է, որ քվեարկությանը մասնակցեն նաև մարզական գործիչներ: Այսինքն՝ ոչ այնքան լուրջ թվացող sms քվեարկությանը կարող է փոխարինել մարզական գործիչներից կազմված հանձնաժողովը:
Նշենք, որ Հայաստանի լավագույն մարզիկների քվեարկությունը տեղի է ունենալու դեկտեմբերին: