Սիրիական ընդդիմությունը կարող է ցանկացած պահի դադարեցնել բանակցությունները «Ժնև-2»-ի շրջանակում: «Մեր պատվիրակությունը կորոշի, թե որքան կշարունակվեն բանակցությունները: Մենք ունենք դրանք ցանկացած ժամանակ դադարեցնելու լիազորություն: Բանակցորդների իմ թիմը լիազորված է իմ կողմից անել դա»,- մամլո ասուլիսի ժամանակ Ժնևում հայտարարել է Սիրիայի ընդդիմադիր և հեղափոխական ուժերի ազգային կոալիցիայի առաջնորդ Ահմեդ Ալ-Ջարբան՝ փոխանցում է ITAR-TASS-ը:
Ընդդիմության պատվիրակության ևս մեկ ներկայացուցիչ՝ Մոնզիր Ակբիկը հավելել է, որ բանակցությունները Ժնևում կսկսվեն վաղ առավոտյան՝ տեղի ժամանակով ժ. 9.10-ին:
Նրա խոսքով՝բանակցությունների ժամանակ սիրիական ընդդիմության և կառավարության պատվիրակությունները կգտնվեն տարբեր հաստատություններում, քննարկումը կընթանա ՄԱԿ-ի և ԱՊԼ-ի 80-ամյա հատուկ ներկայացուցիչ Լախդար Բրահիմիի օգնությամբ, ով կտեղաշարժվի մի տեղից մյուսը:
Ջարբան նշել է, որ իրենց համար առաջնահերթություն է անցումային կառավարության ձևավորումը, որին կենթարկվեն բանակն ու անվտանգության ծառայությունը: Ազգային կոալիցիայի առաջնորդի խոսքով՝ պատվիրակությունը ժամանել է Շվեյցարիա ժնևյան կոմյունիկեի իրականացման համար:
ՄԱԿ-ի եվրոպական բաժանմունքի մամոլ ծառայությունից չի հաջողվել ստանալ որևէ մեկնաբանություն ձևաչափի և միջանկյալ արդյունքների մասին: «Գործընթացը շատ զգայուն է, և կարևոր է այն որևէ հայտարարություններով չվնասելը»,- նշում են այնտեղ:
Ինչպես հայտնի է դարձել, ամեն պահի բանակցություններին կարող են միանալ ռուս և ամերիկացի փորձագետները, որոնք հատուկ այդ նպատակով ժամանել են Շվեյցարիա:
