Թուրքական Evrensel կայքի փոխանցմամբ՝ թուրք վրիժառուների բրիգադը (TIT) թուրքական «Էվրենսել» պարբերականին հղած բաց նամակում սպառնացել է արյունալի գործողություններ իրականացնել Դիարբեքիրում և Ստամբուլում: Դրանք ուղղված են լինելու հայկական համայնքի, հայ և քուրդ մտավորականների դեմ:
Նամակում ահաբեկչական կազմակերպության անդամները պահանջում են, որ օգոստոսի 1-15-ը Թուրքիայի հայ համայնքը լքի «թուրքական հողերը», փակվի հայկական «Ակօս» թերթը և նրա համակիր մյուս լրատվամիջոցները, և դրանց աշխատակիցները նույնպես լքեն «թուրքական հողը»:
Նրանք պահանջում են նաև, որ Թուրքիայից հեռանան «Ներեցեք մեզ, հայեր» ակցիայի կազմակերպիչ Բասքըն Օրանը, քուրդ պատգամավոր Սեբահաթ Թունջելը, Դիարբեքիրի քաղաքապետ Օսման Բայդեմիրը, պոլսահայ լրագրող Էթյեն Մահչուփյանը, ինչպես նաև Քրդստանի աշխատավորական կուսակցության (PKK) համակիրները:
