Ուկրաինայի նախագահ Վիկտոր Յանուկովիչը քաղաքացիներին խնդրել է չենթարկվել արմատականների կոչերին՝ նշելով, որ դեռևս ուշ չէ հակամարտությունը խաղաղ ճանապարհով կարգավորելու համար: Այս մասին փոխանցում է RIA Novosti-ն:
«Եվս մեկ անգամ ընդդիմությանը կոչ եմ անում նստել բանակցային սեղանի շուրջ և դադարեցնել դիմակայությունը: Ես դեմ եմ արյունահեղությանը, ուժի կիրառմանը, թշնամանքի ու բռնության բռնկմանը: Խնդրում եմ մարդկանց վերադառնալ տները: Մենք պետք է Ուկրաինայում վերահաստատենք խաղաղությունը, հանգստությունն ու կայունությունը»,- ասվում է նախագահի կայքում հրապարակված հայտարարության մեջ:
Նա ափսոսանք է հայտնել Կիևում «ծայրահեղականների հրահրած հակամարտության հետևանքով մարդկանց մահվան առնչությամբ»:
Ուկրաինական ընդդիմության առաջնորդներն այսօր հանդիպում կունենան նախագահ Վիկտոր Յանուկովիչի հետ՝ Twitter-ում գրել է «Բատկիվշչինա» խորհրդարանական խմբակցության ղեկավար Արսենի Յացենյուկը:
«Ժամը 13.45-ին (Երևանի ժամանակով՝ 15.45-ին) մենք երեքով կգնանք Յանուկովիչի մոտ: Հանդիպումը հաստատված է»,- գրել է Յացենյուկը:
Բացի Յացենյուկից՝ ընդդիմության առաջնորդների եռյակում են ՈՒԴԱՌ կուսակցության առաջնորդ Վիտալի Կլիչկոն և «Սվոբոդա» ազգայնական կուսակցության առաջնորդ Օլեգ Տյագնիբոկը:
